Entrante 1 di ougùstùs e proseso di kùr vehíkulo ta normalisá

 

Entrante 1 di ougùstùs e proseso di kùr vehíkulo ta normalisá

Geplaatst op 28 July 2020 dor di Ministerio Tráfiko, Transporte i Planifikashon Urbano

WILLEMSTAD – Servisio pa Tráfiko i Transporte (UOVV) ta anunsiá ku entrante djasabra 1 di ougùstùs 2020, e proseso di kùr vehíkulo ta normalisá. Pues e eksonerashon riba but pa esnan ku no por a kùr den temporada di ‘lockdown’ ta kaduká. Pa djaluna 3 di ougùstùs, Polis lo por kontrolá si e karchi di kùr a kaduká den temporada di ‘lockdown’ i ku pues no tin karchi di kùr nobo.

UOVV ta rekòrdá tur persona ku mester di un fecha pa kùr nan vehíkulo, pa sea pasa na Bentana di Informashon na Saliña òf yama 0800-1515 pa traha un sita. UOVV ta urgi tur hende pa kontrolá nan karchi di kùr i traha sita na tempu.

UOVV alabes ke rekòrdá tur kliente ku ta posibel pa paga sea via ‘swipe’ ku karchi di banko (Maestro) òf depositá sèn riba UOVV su kuenta bankario di MCB 31968208 i trese e komprobante inkluso stèmpel di banko komo prueba. No por aseptá sèn kèsh ni transferensia ‘online’.

UOVV di antemano ta yama klientenan danki pa e koperashon.

This site uses Akismet to reduce spam. Learn how your comment data is processed.

error: Content is protected !!
%d bloggers like this: