Prome Minister Evelyn Wever-Croes: PROME DRAFT DI MASTER PLAN: REPOSICIONANDO E RUMBO DI NOS PAIS.

Prome Minister Evelyn Wever-Croes:

PROME DRAFT DI MASTER PLAN: REPOSICIONANDO E RUMBO DI NOS PAIS.

Durante siman a comparti cu e participantenan y stakeholdernan e prome draft di e Master Plan “Reposicionando e Rumbo di Nos Pais” of “Repositioning Our Sails” na caminda pa Aruba su recuperacion economico y futuro.

E plataforma nacional, Comision Recuperacion Economico y Innovacion Aruba ta consisti di mas di 125 persona cu a base boluntario a contribui pa asina yega na un Master Plan pa Aruba cu ta presenta reformanan structural y accionnan concreto pa crea un base solido pa recuperacion economico y innovacion. E Master Plan aki ta conta cu un base amplio di conocemento di expertonan local y tambe a tene cuenta cu estudionan y plannan existente di e ultimo añanan.

Despues cu ricibi comentarionan di e participantenan y stakeholdernan, lo presenta e plan oficial na publico den e proximo dos simannan.

Prome Minister Evelyn Wever-Croes den nomber di Gobierno di Aruba ta expresa e orguyo den e trabou incansabel di e boluntarionan aki y ta gradici cada un di nan pa nan dedicacion, tempo, esfuerso y contribucion den e momentonan aki unda cu como pais nos ta enfrentando retonan nunca bisto.

 

Mi ta hopi orguyoso di e mas di 125 persona cu a participa den e taskforcenan pa delinea e futuro di nos pais. Reposicionando nos rumbo como pais, pa Aruba mas fuerte, pa un economia mas fuerte y pa un autonomia mas fuerte. E masterplan aki ta pendiente e feedback di e participantenan pa despues wordo publica. Poco poco, pero sigur nos ta delinea con pa sali di e crisis. Hunto nos lo prevalece”, Prome Minister a expresa.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: