Supsidio pa kumpra kosnan di skol ku tur aña ta wòrdu entrega na mayornan ku ta bin na remarke pa esaki, te ku awe nan no a risibí e supsidio aki

 

Willemstad, 04 di ougùstùs 2020

 

Presidente di Parlamento di Kòrsou

Señor A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di SOAW, señor Hensley Koeiman.

 

Danki pa e koperashon.

 

Atentamente,

 

Jacinta Constancia

Parlamentario pa

Frakshon di MFK

 

Minister di SOAW

Señor H. Koeiman
PRESENTE

Kòrsou, 04 di ougùstùs 2020


Tópiko: Supsidio pa kumpra kosnan di skol ku tur aña ta wòrdu entrega na mayornan ku ta bin na remarke pa esaki, te ku awe nan no a risibí e supsidio aki

 

Señor Minister Koeiman,

 

Suskrito Parlamentario pa Movementu pa futuro Kòrsou (MFK) a risibí informashon di persona(nan) ku ta desempleá i/òf ku ta kobra ònderstant ku ainda ministerio di SOAW, ku ta kai bou di responsabilidat di Minister Hensley Koeiman, no a duna esnan ku ta bin na remarke pa e supsidio aki, esaki pa kubri gastunan básiko manera unifòrm pa skol pa yu(nan).

 

Un grupo grandi di persona ku ta desempleá i/òf ta kobra ònderstant ya a entrega “schoolverklaring” i tambe nan a yena formulario ku un kantidat di pregunta i te ainda nan no por keda kla, pa risibí e supsidio aki. Hopi ta mayornan ku a pèrdè trabou i otronan ta wardando kontesta riba e petishon ku nan a entrega pa bin na remarke pa kobra ònderstant.

 

E situashon di pobresa ta alarmante na Kòrsou i meskos ku nos por a tuma nota di e lista di NOW riba retnan sosial kon gobiernu a zorg pa empresanan haña sumanan astronómiko pa nan por sobreviví, di mes un forma diligente i rápido gobiernu (lesa SOAW) mester atendé ku esnan di ménos rekurso den nos komunidat. Mester stòp di tormenta e hendenan aki ki ora ku nan mester bin na remarke pa un ayudo di gobiernu.

 

Suskrito Parlamentario pa Frakshon di MFK ta aserka Minister di SOAW, konforme artíkulo 96 di reglamentu di Orden, ku e siguiente preguntanan;

 

  1. Minister ta na altura di e supsidio pa persona(nan) ku ta bin na remarke por risibí un yudansa finansiero (100,-) pa kompra unifòrm pa skol?

 

  1. Minister ta na altura ku skol ta habri dia 20 ougùstùs, próksimo i ku personanan di ménos rekurso aki mester di e supsidio aki pa por kumpra unifòrm pa nan yunan?

 

  1. Minister por informá pa kua fecha lo depositá e suma pa mayornan asina nan por kumpra unifòrm pa yunan?

 

  1. Minister por informá Parlamento ta dikon tur biaha ku tin ku kumpli ku esnan ménos pudiente den nos komunidat mester tin tardansa?

 

  1. Minister por informá si tin oportunidat ainda pa mas persona desempleá por apliká pa e supsidio aki?

 

  1. Minister ta na altura ku tin hopi skol ku ta sera i hopi mayor no por risibí un “schoolverklaring”?

 

  1. Minister no por hasi un eksepshon i laga sea raport of  diploma di e yu konta komo komprobante na luga di e “schoolverklaring”?

 

Na nòmber di mayornan suskrito ta spera ku Minister lo kontesta nos preguntanan den e tempu akordá entre Parlamento i Gobiernu pa asina por haña bista i klaridat riba e problema aki. 

 

Atentamente,

      

 

Jacinta Constancia

Parlamentario pa

Frakshon di MFK

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: