Gobièrnu ta firma akuerdo ku Digicel

Gobièrnu ta firma akuerdo ku Digicel

Geplaatst op 10 August 2020 dor di Ministerio Enseñansa, Siensia, Kultura & Deporte

Willemstad – Ministerio di Enseñansa, Siensia, Kultura i Deporte (ESKD), na nòmber di Gobièrnu di Kòrsou, a firma un akuerdo ku Digicel den kua ta brinda oportunidat na un grupo di alumno pa konektá mas fásil na internèt pa medio di un aparato di MiFi. E akuerdo aki a keda firmá djabièrnè último, dia 7 ougùstùs na ofisina prinsipal di Digicel. Direktor di Digicel, sr. Roeland van der Hoeven i Minister di ESKD, sr. Eugene Rhuggenaath den presensia di un tim di Ministerio i representante di e diferente direktivanan di skol a firma e akuerdo pa inisiá e proyekto aki.  

Durante e temporada di Toke de Keda, Gobièrnu di Kòrsou a keda aserká pa Digicel ku e propuesta pa un proyekto piloto den kua lo krea mihó aksesibilidat pa studiantenan ku no tin akseso na internèt pa medio di un sistema di MiFi. MiFi ta un sistema di Wi-Fi mobil ku ta hasi posibel pa un persona risibí akseso na internèt pa medio di un konekshon portátil. Den e kaso aki, un (1) aparato di Mi-Fi lo por konektá un total di dies (10) studiante na internèt.

Tim di maneho di Ministerio di ESKD a hasi tur esfuerso pa asina logra konkretisá e propuesta aki i finalmente e akuerdo entre Digicel i Gobièrnu di Kòrsou a keda firmá ofisialmente djabièrnè último.

Durante di e periodo di 10 ougùstùs te ku 20 desèmber 2020 Digicel lo proveé 100 aparato di MiFi ku internèt di forma grátis ku lo keda usá pa e alumno di skol di fundeshi i/òf sekundario ku ta bini na remarke pa esaki. E trayekto pa uso di e aparatonan di MiFi lo keda kanalisá huntu ku e diferente direktivanan pa skolnan di fundeshi i sekundario di forma ku esnan ménos pudiente por logra risibí e sosten nesesario.

Realisashon di e proyekto aki entre Digicel i Gobièrnu di Kòrsou un biaha mas ta enfatisá e importansia di un kolaborashon estrecho entre sektor públiko i sektor privá. Ku konkretisashon di e kolaborashon aki, Gobièrnu di Kòrsou ta hasi un yamada na mas distribuidor pa partisipá na e proyekto aki i asina yuda alsa kalidat i bienestar di enseñansa dor di krea mas posibilidat pa alumnonan ku no ta disponé di un konekshon di internèt na kas.

Gobièrnu di Kòrsou públikamente ta gradisí Digicel inmensamente pa e gesto aki.
Huntu nos ta krea un pais fuerte.

 

** riba e potrètnan athunto por tuma nota di e momentu kaminda Minister Eugene Rhuggenaath i Direktor Roeland van der Hoeven a firma e akuerdo