Kontribushon pa un solushon pa Kòrsou den tempu di krísis ekonómiko i di likides di pais.

Kontribushon pa un solushon pa Kòrsou den tempu di krísis ekonómiko i di likides di pais.
Willemstad, 12 ougùstùs 2020
Den e kontribushon aki PIN ta trese un solushon ku e meta pa kibra e impase ku ta eksistí entre e
paisnan den Karibe i Ulanda relashoná ku e proposishon Ulandes pa bin ku un entidat yama
“Caraïbische Hervormingsentiteit”. Esaki pa atendé ku e fiansanan nesesario debí na e falta di likides
di pais ku a surgí dor di Covid 19, esta ku no tin sèn ta drenta kaha di Gobièrnu pa por kumplí ku
debernan i asistensia sosial na nos pueblo.
E “Caribische Hervormingsentiteit – CHE”, manera proponé dor di Hulanda, no tin nada Karibense ku ne.
Ulanda a proponé un órgano di gobernashon, trahá segun lei Ulandes, den kua ekspertonan nombrá pa
Ulanda, ta tuma desishon riba leinan i proyektonan den nos pais. E entidat “CHE” aki, ta responsabel na
e minister di Asuntunan Interno di Ulanda. E proposishon aki ta kontra tratadonan internashonal, kontra
Statüt di Reino i kontra nos Areglo di Estado. E proposishon Ulandes ta pone nos Gobièrnu i nos
Parlamento un banda i ku esei violá e prinsipio di estado di derecho ku tur akshon di gobièrnu mester ta
basá riba lei. Na mes momentu, e ta kontra demokrasia paso dor di pone Parlamento di Kòrsou un
banda, e ta pone e pueblo votadó di Kòrsou un banda. Ta p’esei tantu ekspertonan riba lei estatal komo
Raad van Advies ta bisa ku e proposishonnan di Ulanda ta inakseptabel.
Kiko awor? Kòrsou i nos hermana islanan mester di sèn pa por drai. Ekonomia ta plat, gobièrnu mester
di sèn pa paga por ehèmpel polis, dosentenan, hospital i yuda esnan ku ta sin trabou, etc. Nos mester di
e fiansanan I pa optené esakinan, lei ta eksigí ku tin mester e konseho di Komishon di Supervishon
Finansiero “Cft” i ku mester tuma lugá via Ulanda na promé lugá. Si nos ke un fiansa riba merkado
internashonal, e Konseho di Minister di Reino (lesa: Ulanda) mester aprob’é. Kiermen, nos mester
atendé ku Ulanda den tur kaso.
Lo tabata korekto pa Hulanda separá e nesesidat di Kòrsou- ku ta meskos ku mayoria pais na mundu- pa
un fiansa urgente ku ta nesesario komo konsekuensia di Covid 19, for di e nesesidat di reformá
struktural sosial-ekonómiko i invershon den áreanan ei. Ku òf sin e distinshon ei, nos por mira ku Ulanda
ta bisa -korekto òf nò- ku nos falta forsa di akshon, transparensia i tin kue tin nesesidat di supervishon.
Lòs di nos opinion riba e ponensianan di Ulanda, nos ta propon’é pa, si disidí di bin ku un entidat pa
reforma di e struktura sosial-ekonómiko di nos pais, hasi uso di un solushon simpel ankrá den nos Statüt.
Artíkulo 37 di Statüt ta brinda e posibilidat pa bin ku un órgano komun (gemeenschappelijk orgaan) di e
paisnan.
E tarea di e órgano komun mester ta pa (1) prepará e leinan ku ta nesesario basá riba e reformanan
palabrá i (2) sostené e trabounan di ehekushon di di e leinan.