Edukashon

 

Willemstad 17 di ougùstùs 2020

 

Awe 17 di ougùstùs 2020, nos ta konmemorá e lucha di Tula, nos héroe nashonal ku a bringa pa libertat i igualdat di tur hende.

 

Siguiendo ku e lucha pa libertat i igualdat, PIN ta para pa un formashon di nos yunan ku ta duna kontenido na nos mes futuro, ku vishon i akshon. 

E prinsipio di e aña eskolar mester ta un momento di estímulo pa nos sistema di enseñansa haña e atenshon ku e meresé. 

 

PIN ta konsiderá edukashon di nos yunan prioridat number unu di pais i ke mira un sistema di enseñansa ku ta forma e ‘yu di Kòrsou nobo’, ku  ta pas riba merkado laboral i tin abilidatnan di siglo 21. Pa nos yega asina leu esaki ta rekerí  pa  nos revisá i diseñá un sistema di enseñansa nobo. 

 

PIN ta señalá ku enseñansa ta vital pa desaroyo duradero di nos pais. Nos mester realisá  ku nos sistema di enseñansa ya pa añanan no ta duna  resultado optimal. Sinembargo e adaptashonnan ku nos a konosé, no a duna e resultado ku nos ta deseá. Ku urgensia nos ke pidi gobièrnu pa kuminsá un proseso den diálogo nashonal, ku dosentenan, mayornan, komersio, sindikalismo i hóbennan pa nos por yega na un sistema di enseñansa inová ku:

–  ta inkluí tur mucha sin importá nan limitashonnan kognitivo, físiko òf sosial.

–  ta tuma lugá den un ambiente mas  moderno i digitalisá. Esaki tantu pa e kuríkulo,    komo método,  e instrumentonan i e edifisionan.

– un programa ku ta ekipá pa sostené nos dosentenan den ehekushon di e programa nobo.

 

Nos mester realisá ku ta na momentu ku ahustá e tantísimo áreanan disfunshonal den nos sistema di edukashon, nos ta brinda oportunidat di edukashon real  na  nos yunan. 

 

Apesar ku nos pais ta pasando den momentunan ekstremadamente difísil, nos kurason ta bati yen di bon deseo pa nos muchanan tin un aña eskolar eksitoso. Nos ta kere ku netamente e difikultatnan ku nos mester atendé den nos pais, mester ta e empuhe pa uni i na bienestar di nos yunan i start e diálogo real pa yega na un sistema inová di enseñansa. 

 

Pa mas informashon: Sidayen van Tijs – Senora Tel: 522-6694