E registro di esklabo i e registronan di emansipashon di Kòrsou ta online

E registro di esklabo i e registronan di emansipashon di Kòrsou ta online

Geplaatst op 18 August 2020 dor di Ministerio Maneho di Gobernashon, Planifikashon i Servisio Públiko

Willemstad – Entrante 17 di ougùstùs e registro di esklabo (1839-1863) i e registronan di emansipashon (1863) ta disponibel digital, via e wèpsaitnan di Archivo Nashonal Kòrsou i Archivo Nashonal Hulanda. Publikashon digital di e registronan aki a bira posibel danki na e kolaborashon entre Radboud Universiteit Nijmegen, Archivo Nashonal Kòrsou, Universidat di Kòrsou Dr. Moises Da Costa Gomez i Biblioteka Mongui Maduro, ku sosten di Archivo Nashonal Hulanda.

E inisiadornan di e proyekto aki ta premirá ku disponibilidat di e fuentenan di archivo aki lo por halsa interes p’e historia di sklabitut na Kòrsou i tambe por sostené tur esnan ku ta buska informashon di nan antepasadonan, ku a biba den sklabitut.

Efekto i impakto di sklabitut
Publikashon di e registronan di esklabo i emansipashon di Kòrsou ta parti di un proyekto ku mester yuda investigá e efekto di sklabitut i su impakto riba generashonnan despues di abolishon di sklabitut na 1863. Den e último añanan e lider di proyekto, historiador Coen van Galen, tabata envolí den e proseso di publikashon di e registronan di esklabo di Sürnam i durante e periodo aki hopi biaha e tabata haña e pregunta: ‘Ki dia e registronan di esklabo di Kòrsou ta bai “online”?’

I awor mas lihé ku a spera e registronan kurasoleño ta online. Esaki ta danki n’e bon kolaborashon entre e institutonan konserní. Den esaki, sigur mester elogiá e trabounan dje investigadó Els Langenfeld (q.e.p.d.). Segun direktor di Archivo Nashonal Kòrsou, Max Scriwanek: ‘Durante su investigashon Langenfeld a traha un endèks p’e registronan di esklabo i esaki a keda entregá na biblioteka Mongui Maduro, despues di su morto na 2013. Finalmente e trabou aki a yega Archivo Nashonal Kòrsou pa medio di Els su famia i mester bisa ku e endèks aki a yuda bon, den konstrukshon di e “Dbase” aki’.

E Registro di esklabo i e registronan di emansipashon di Kòrsou
E “database” ku a keda publiká ta konsistí di un registro di esklabo i dos registro di emansipashon. E registro di esklabo di Kòrsou, ta un registrashon di tur doño di katibu privá durante e periodo 1839 te ku abolishon di sklabitut na 1863. Di kada persona tabata registrá nòmber di dilanti, aña di nasementu, nòmber di mama i nòmber di e doño di katibu. Banda di esaki e registro aki ta kontené informashon tokante nasementu, fayesimentu, benta di hende i importashon i eksportashon di hende. Paso na siglo 19, ainda Kòrsou tabata sentro di kòmersio di katibu internashonal na eskala chikí.

E registronan di emansipashon, ta registronan ku ta kontené informashon di personanan ku e rekobrá nan libertat for di sklabitut, 1 di yüli 1863. E registronan aki ta komplementá e registro di esklabo, mirando ku e registronan di emansipashon ta kontené e famnan ku e hendenan a haña na 1863. Segun Johan van Langen di Archivo Nashonal Hulanda, ‘Awor hulandesnan ku “roots” kurasoleño por investigá nan historia familiar mas fásil. Banda di esaki e disponibilidat online di e archivonan di e pasado kompartí di Kòrsou i Hulanda, lo fasilitá investigashonnan sientífiko. Esaki por ta entre otro un investigashon basá riba efektonan di sklabitut i kolonialismo, kual mas i mas ta haña atenshon den e debate sosial’.

Dia 17 di ougùstùs 2020 a pone e registro di esklabo i e registronan di emansipashon di Kòrsou online. A skohe pa e fecha aki, mirando ku ta ‘Dia di Tula’ i e ‘Lucha pa Libertat’. Riba e fecha aki Kòrsou ta konmemorá 225 aña di e lucha inkansabel ku Tula i su kompañeronan a hiba i ku a kondusí na liberdat.

E proyekto aki ta kolaborashon entra Radboud Universiteit Nijmegen, Universidat di Kòrsou, Archivonan Nashonal di Kòrsou i Hulanda i Biblioteka Mongui Maduro Kòrsou. Realisashon di e proyekto aki a bira posibel dor di supsidio di Stichting Democratie en Media i Platform Digitale Infrastructuur SSH. E registronan di esklabo ta parti di e Memory of the World Register – Latin America and the Caribbean di UNESCO.

Por yega n’e registronan pa medio di e siguiente linknan:
– Archivo Nashonal Kòrsou https://www.nationaalarchief.cw/slavenregister
– Archivo Nashonal Hulanda https://www.nationaalarchief.nl/onderzoeken/index/nt00462

NOTA PA REDAKSHON:
Pa mas informashon por  konsultá e FAQ (frequently Asked Questions) athuntu.
Persona di kontakto: Modianne Cathalina (modianne.cathalina@gobiernu.cw) / Glendalin William (glendalin.william@gobiernu.cw )