INISIO DI TRABOUNAN PA KONSTRUKSHON DI PARKE DI REKREO DEN KAYA TINASHI NA KORAAL SPECHT

INISIO DI TRABOUNAN PA KONSTRUKSHON DI PARKE DI REKREO DEN KAYA TINASHI NA KORAAL SPECHT

Willemstad-  Minister Presidènt di Kòrsou, sr. Eugene Rhuggenaath, djamars dia 18 di ougùstùs a hasi e “groundbreaking” pa trabounan kuminsá pa konstrukshon di un parke di rekreo na Kaya Tinashi den Koraal Specht. Esaki ta parti di trabounan realisá pa Reda Sosial komo parti di e Agènda pa Desaroyo Sosial di e Strategia di Kresementu pa Kòrsou. Unabes e parke ta kla e lo kontribuí na alsa e ambiente den e bario i krea espasio pa tantu hóben komo hende grandi di bario dibertí, rekreá i tene kurpa den kondishon.

E parke di rekreo lo konsistí di un parti sentral kaminda hendenan por sinta trankil i gosa di e ambiente den bario. Banda di esaki, ta bin ekiponan pa muchanan entretené nan mes ora nan bishitá e parke. A inkluí den e parke tambe ekiponan pa habitantenan por ehersitá i tene kurpa den kondishon. Pa loke ta trata e aspekto logístiko di e parke, a tene kuenta ku nos medio ambiente dor di pone lusnan ku ta traha ku energia solar. E flur lo ta di blòkinan di klenku ku lo kaba di krea un ambiente modèrno den e parke. 

E trabounan di konstrukshon di e parke ta keda realisá pa MM Steel Solutions, bou di supervishon di Kroes Design. Durashon di e trabounan ta 4 luna i e invershon total ta Nafl.147.000,-. A pone e fondonan pa e proyekto aki disponibel komo parti di Strategia di Kresementu di Kòrsou.

 

Minister Presidènt Rhuggenaath, den su palabranan na okashon di inisio di e trabounan, a enfatisá e kompromiso di Gobièrnu pa krea un miho bibá den nos barionan. Áreanan di rekreo multifunshonal manera esun den kaya Tinashi na Koral Specht ta kontribuí engrande na un mihó kalidat di bida pa e habitantenan di bario.  Minister Presidènt tin sigur ku Reda Sosial, manera sa hasi ku tur otro proyekto, lo konkluí esaki tambe eksitosamente pa asina habitantenan di Koraal Specht, partikularmente esnan den besindario di e parke, por gosa di dje plenamente.

 

This site uses Akismet to reduce spam. Learn how your comment data is processed.

%d bloggers like this: