Petishon pa un reunion di Komishon Sentral di parti di frakshon di MFK, ku topiko; Reunion di Komishon Sentral relashoná ku inkumplimento di gobiernu di Kòrsou ku pagonan na Selikor ku lo tin komo konsekuensia ku kuponan di trabou na Selikor ta na peliger
Willemstad, 17 di ougùstùs 2020
Na: Presidente di Parlamento
Señora A. Pauletta
Wilhelminaplein # 4
PRESENTE
Tópiko: Reunion di Komishon Sentral relashoná ku inkumplimento di gobiernu di
Kòrsou ku pagonan na Selikor ku lo tin komo konsekuensia ku kuponan di trabou na Selikor ta na peliger
Apresiabel Sra. Pauletta,
Frakshon di Movementu Futuro Kòrsou (MFK), a wòrdu aserka pa diferente empleado di Selikor ku e preokupashon ku, si e komportashon finansiero di gobiernu di Kòrsou kontinuá di e forma aktual ku Selikor mester redusí personal den servisio di e empresa.
For di investigashonnan ku nos frakshon a realisá, nos bin komprondé ku gobiernu di Kòrsou no ta pagando Selikor pa trabounan di limpiesa ku mester tuma lugá den diferente area di Kòrsou.
Komo konsekuensia di e komportashon aki di gobiernu di Kòrsou, Selikor a haña su mes obligá di para trabounan di limpiesa riba e asina yama “hoofdwegen”.
Aqualectra ta enkargá ku kobransa di e rekargo di 35 florin ku kada kas di famia tin ku paga pa rekohé nan kònteiner di sushi. Aqualectra na su turno ta transferí e sumanan risibí riba kuenta di gobiernu di Kòrsou. Gobiernu di Kòrsou no ta kumpli ku su obligashon pa transferí e sumanan aki pa Selikor.
Komo konsekuensia di e mal komportashon i inkumplimento di pago di parti di gobiernu di Kòrsou, Selikor a bin ta hasi uso di su reservanan finansiero pa por tene kabes riba awa. Si no bin un kambio den e forma di proseder di gobiernu, Selikor ta haña su mes obligá na apliká retiro forsoso bou di e personal den servisio permanente di Selikor.
Teniendo na kuenta ku Selikor tin un ròl sumamente importante den mantenshon di limpiesa na Kòrsou i tambe tin komo tarea garantisá un Kòrsou limpi di sushedat i un medio ambiente kaminda komunidat di Kòrsou no por wòrdu kontagiá pa malesa.
Frakshon di MFK ta pidi un reunion di komishon sentral pa por skucha gerensia di Selikor, Minister di Finansa i Minister di GMN kende ta enkargá ku e kartera di salubridat.
Frakshon di MFK ta spera ku mirando seriedat di e situashon, ku presidente di Parlamento lo yama e reunion aki mas pronto posibel i si ta posibel ku karakter di urgensia.
Na nòmber di frakshon di MFK,
Gilmar Pisas Jacinta Constancia Charles Cooper Juniël Carolina