Outonan i otro materialnan ku ta nesesario pa un bon funshonamentu di Kuerpo Polisial di Kòrsou (KPC)
Presidente di Parlamento di Kòrsou
Señora A. Pauletta
Wilhelminaplein # 4
PRESENTE
Willemstad, 31 di ougùstùs 2020
Señora Pauletta,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Hustisia, Quincy Girigorie.
Danki pa e koperashon.
Atentamente,
Juniël R. Carolina
Miembro di Parlamento
pa frakshon di MFK
Minister di Hustisia
Sr. Quincy Girigorie
PRESENTE
Kòrsou, 31 di ougùstùs 2020
Tópiko: Outonan i otro materialnan ku ta nesesario pa un bon funshonamentu di Kuerpo Polisial di Kòrsou (KPC)
Apresiabel Minister,
Suskrito a tuma nota ku KPC a haña algun outo nobo pa nan por hasi nan trabou. Nos ta sumamente kontentu ku despues di nos karta fecha 20 di ougùstùs 2019, pa Minister Girigorie, kaminda suskrito a hasi pregunta na Minister riba e skarsedat di outo ku tin den KPC, ku Minister a kumpra algun outo pa e kuerpo.
Nos ta konsiente ku e kantidat di outo aki no ta solushoná e problema agudo ku di vehíkulo ku a bin ta manifestá su mes durante di e último kuater añanan ku a transkurí i nos ta spera ku pronto nos por mira ku Minister di hustisia lo ekipá e kuerpo ku mas outo pa trese un solushon struktural na e problema di vehíkulo aki den KPC.
Suskrito ta spera ku Minister lo revisá e maneho aktual relashoná ku e flota di outo di KPC i kaminda ta nesesario pa trese e kambionan nesesario pa asina e outonan por wòrdu uza di forma mas efisiente i asina nan tempu di uzo lo por ta mas largu i na benefisio di KPC ku ta hasi uzo di e outo, pero tambe pa e por hasi su trabou muchu mas mihó. Manera ya menshoná KPC falta hopi mas outo pa por funshoná di forma optimal.
Frakshon di MFK ta spera di kurason ku tabatin un repartishon hustu di outonan pa tur e departamentonan ku tabatin nesesidat por dispone di por lo ménos un outo pa hasi nan trabou. Nos ta spera ku a kòrda riba e regisornan di bario (buurtregisseur).
Komo miembro di Parlamento mi ta aserka Minister hasiendo uso di artíkulo 96 di Reglamentu di órden di Parlamento, ku e siguiente preguntanan;
Minister por informá Parlamento kuantu outo mas KPC tin mester pa por solushoná e problema agudo di outo den e kuerpo?
- Kiko ta e planifikashon di mas aña pa remplasá outonan den KPC i pa ki fecha nos por ku lo ekipá e kuerpo ku mas outo?
- Minister por informá Parlamento kon ta para ku e sistemanan di Afix (Vingerafdruk Systeem) i Ibis (Ballistisch Systeem)?
- E tim ku ta hasi estudionan forensiko ta dispone di e materialnan nesesario pa por ehekutá nan trabou?
- Meskos nos kier sa si tin sufisiente material pe sekshon tékniko ku ta esnan spesialisá den duna ayudo den e aspektonan teknologia?
Atentamente,
Juniël Carolina
Miembro di Parlamento
pa Frakshon di MFK