GISETTE SEFERINA (PAR): “NEE, DAT DOE JE NIET STAATS SECRETARIS KNOPS!”

 

GISETTE SEFERINA (PAR): “NEE, DAT DOE JE NIET STAATS SECRETARIS KNOPS!”

Willemstad- E programa di e Sekretario di Estado hulandés Raymond Knops a parse mas un tour di PR di malgusto pa eksponé nesesidat di nos hendenan, òf un onderonsje ku amigu periodista i esnan ku ta apoyá e agènda di Gobièrnu Ulandes.  Si di bèrdat e Sekretario di Estado tabatin bienestar di nos pueblo na pechu lo ela hasi bon uso di e oportunidat aki i sinta na mesa i kombersá tokante e puntonan ku e gobièrnunan di Kòrsou i Hulanda tin diferensha di opinion riba dje pa  yega na un akuerdo pa ku e sosten ofresé dor di Hulanda.  Ta inkonsebibel ku henter un Sekretario di Estado di Hulanda ta sali for di Den Haag, ku tur e komplikashonnan ku e pandemia di COVID-19 ta trese kun’é, pa bin parti saku di kuminda den barionan anto sinta kombersa ku algun bon amigu, mientras nos pais ta den krisis.

Ta ku beneplásito por a tuma nota di e bishita ku Sekretario di Estado tabatin planea pa bini Korsou.  Kòrsou na e momentu aki lo mester raportá tokante di nos progreso enbista di eksigenshanan pa loke ta e di dos tranch di e sostén primintí.  Minister President klaramente a vosiferá ku Kòrsou no tin masha opheshon pa e ku e proposishonan di e asina yamá ‘landspakket’; hasta por bisa ku, e “landspakket” ta reflehá den liña grandi loke Kòrsou mes a proponé den su strategia di kresementu i tambe den e ‘hervormingsprogramma’. Kòrsou ta den negosashon ku Hulanda netamente tokante di e entidat ku Hulanda ke instituí pa koordiná e programa di reforma ariba menshoná; speshalmente en bista di te kon leu e entidat di reforma aki, ku lo haña un outoridat masha grandi, ta pas den nos leinan vigente.  Pues e bishita di e mandatario Hulandés a parse un momentu ideal pa Kòrsou i Hulanda sinta aki riba nos suela i atendé manera dos partner madurá.

Pero e bishita a resultá unu di mal gusto ku ta intenshoná únikamente komo un stunt di publisidat, pa mustra kon generoso i bondadoso Hulanda ta.  “Na Hulanda, evidentemente, e   senarionan di hende na Kòrsou ku ta tuma saku di kuminda ta muchu mas importante ku e seriedat di e situashon krítiko ku nos pais ta pasando aden!  Anto si e intenshon di bishitá kas di hendenan humilde tabata genuino, lo por tabatin hasta komprenshon. Pero pa kana, bon ekipá ku henter un tim di kamarógrafo pa plama e bista di abo, sekretario di estado Hulandés, ku un kara di santu, ta parti saku di kuminda, sí ta dimás!” asina e miembro di Parlamento di Kòrsou, Sra. Gisette Seferina, a deklará.  “E ta mustra no solamente un falta di interés i seriedat pa atendé ku nos Gobièrnu i nos pueblo pero tambe mustra un falta di respèt pa dignidat di hende.  “Nee, dat doe je niet Meneer Knops!”, e parlamentario a bolbe enfatisá.

Segun Seferina, sekretario di estado Sr. Knops, a bin te Kòrsou pa usa e komunidat hulandés su sèn di belasting  hasi pa e tipo di mal grasia aki.  “E kos aki ta parsemi mas bien un kampaña polítiko personal barata di señor Knops, ku resientemente a keda nombrá komo lider di kampaña di e partido polítiko CDA pa próksimo elekshonnan na Hulanda, na mart 2021!” asina Seferina ta terminá bisando.  E parlamentario ta spera ku e vupá aki ta sirbi komo un lès i ku Sekretario di Estado ta haña su kaminda pa mesa di negosashon pa atendé e puntonan real ku mester keda atendé, pa nos por sali for di krisis ku nos ta den. Pueblo di Kòrsou mester di sosten real i no limosna. Nos no  mester di ningun Sekretario di Estado pa sali for di Den Haag bin Kòrsou bin hunga “zakkendrager ” den barionan ku ta malhuzá e situashon di COVID-19 pa hasi “dorps politiek.” ***

 

______________________________________________________________

Gisette Seferina

Miembro di Frakshon

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: