FUSHON DI INSTANSIANAN DI HUSTISIA TA BAI KUMINSA

 

FUSHON DI INSTANSIANAN DI HUSTISIA TA BAI KUMINSA

Geplaatst op 14 September 2020 dor di Ministerio Hustisia

WILLEMSTAD – Den un kick-off meeting ku Minister di Hustisia, sr. Quincy Girigorie, siman pasá e la duna e señal di forma ofisial pa kontinuá ku e trayekto di fushon di kuater instansia ku ta kai bou di Ministerio di Hustisia. Ta e intenshon pa yega na un organisashon nobo ku lo keda enkargá ku tur tarea hudisial ambulante pa ku hóben i tambe promé ayudo na víktimanan mara na un sentral pa mèldu kasonan di violensia relashonnan inkluso violensia kontra mucha.

Ta trata un un fushon di e siguiente fundashonnan; Ambulante Justitiele Jeugdzorg Curaçao (AJJC), Gezinsvoogdijinstelling (GVI) , Stichting Slachtofferhulp Curaçao (SSHC) i e organisashon di gobièrnu konosí komo Voogdijraad. Tur e organisashonnan aki te enkargá ku tareanan hudisial ku ta stipulá den lei i/o den tratadonan internashonal. Algun di e funshonnan aki ta: resosialisashon di hóbennan, kastigu alternativo pa evitá ku hóbennan ta haña un asina yama “strafblad”, duna konseho na korte pa pone un hóben bou di protekshon, regla asina yama alimentashon pa hóbennan, para komo voogd di famia, guia famia di hóbennan i duna ayudo na víktimanan di violensia relashonal.

IMPORTANSIA

Den e tempu benidero lo tene diferente kòmbersashon ku esnan envolví pa haña nan input den e trayekto di fushon. Personal di Bureau Voogdijraad a keda informá resientemente dor di Minister di Hustisia tokante totalidat di e trayekto di fushon paso ta resientemente a tuma e  desishon ku e instansia aki tambe ta bai forma parti di e fushon. Personal di e fundashonnan ya tabata na altura kaba, komo e pensamentu original tabata enserá un fushon di solamente e fundashonnan.

E trayekto original di fushon ya tin un tempu kaba andando pero ku dor di sirkunstansia  di entre otro  e pandemia di COVID-19 esaki no por a kontinuá. Konsiderando ku e nesesidat i importansia di e fushon a keda mes relevante, a disidí pa kontinuá ku e fushon aktualmente.

Fushon di fundashonnan no ta un fenómeno nobo, komo ku el a wòrdu menshoná desde aña 2014 den e rapòrt Mollen, den kua a hasi investigashon tokante relashon di supsidio entre gobièrnu i su instansianan supsidiá di manera ku por oumentá efektividat i efisiensia. For di punto di bista di realisashon di metanan, efisiensia i ekonomisá gastu a disidí den Konseho di Minister na luna di yanüari 2019, pa realisá e fushon di e fundashonnan di hustisia.

DERECHO

Apesar ku e fundashonnan a demostrá nan derecho di eksistensia ampliamente, nan servisionan ta na peliger pa motibu di retonan finansiero ku nan ta enfrentá dor ku kada bes ta kòrta den supsidio. E tareanan ku e fundashonnan aki ta ehersé ta stipulá pa lei i tambe ta ankrá den tratadonan internashonal  manera ya a wòrdu bisa, motibu pa kual nan mester keda garantisá den un estado di derecho.

Un funshon nobo ku e organisashon nobo ta bai haña aserka ta ku einan ta bai ubika un sentral pa mèldu kasonan di violensia relashonal. For di e Plan Nashonal kontra violensia relashonal i abusu di mucha, Ministerio di Hustisia a keda enkargá tambe ku e tarea pa sentralisá i implementá un punto sentral di mèldu (meldpunt) pa Kòrsou kompleto.

VISHON

Un organisashon di proyekto ku ta konsistí un lider di proyekto di Ministerio di Hustisia asesorá pa SOAB a keda instalá pa realisá e trayekto di fushon aki ku lo dura diesocho luna. E meta ta pa finalisá e fushon na luna di desèmber 2021. Ta mas ku klaru ku lo informá sindikatonan ku tin miembro den e diferente instansianan menshoná na su debido tempu, riba base regular, di desaroyonan pa loke ta trata e fushon.

Minister di Hustisia ta enfatisá ku tin un dokumento di vishon riba mesa ku ta duna e direkshon, kon e trayekto di fushon mester bai kana pero tantu gerensia i personal di e kuater instansianan lo haña oportunidat pa duna nan input promé ku yega finalmente na e organisashon nobo.