Título: Un alternativa mas pa atendé ku falta di likídes, rebibá ekonomia i generá divisa den tempu di Covid-19.

 

Título: Un alternativa mas pa atendé ku falta di likídes, rebibá ekonomia i generá divisa den tempu di Covid-19.

 

Partido Inovashon Nashonal (PIN) ta siguí ofresé solushon pa nos retonan. Anteriormente PIN a presentá un proposishon konkreto pa un Areglo Mutuo entre e paisnan den Reino, Kòrsou, Aruba, Sint Maarten i Hulanda, pa un Entidat Komun di Reforma basá riba solidaridat, pa den koperashon  ku otro i ku asistensia di un fiansa for di Ulanda, atendé e problemanan di tur 3 pais den Karibe.

Awor PIN ta ofresé un di dos alternativa, esaki basá riba e propio forsa di Kòrsou. 

E alternativa aki ta konsistí di un meskla di akshonnan konkreto pa atendé ku falta di likides presupuestario komo konsekuensia di e pandemia Covid-19, pa generá invershon den nos ekonomia i pa atendé ku e nesesidat di divisa pa nos por kumpra nos produktonan den eksterior. 

 

Mirando e komoshon i divishon profundo ku e proposishon di sr. Knops ta kousa den nos komunidat pa un fiansa di un miar florin repartí den 7 aña riba 3 pais, PIN a formulá un di dos alternativa pa Kòrsou atendé ku su mes retonan lòs for di Hulanda.  Di e forma aki Kòrsou ta asumí su mes responsabilidat. Si na kaminda Hulanda aseptá un diálogo real, semper komo partner den Reino Kòrsou mester bai mesa i purba yega na un akuerdo mutuo. 

 

Na promé lugá, Gobièrnu di Kòrsou mester di likídes pa por siguí brinda komunidat servisionan públiko manera polis, enseñansa, skol, ònderstant, kuido médiko, ets. Esaki ta sosodé ku sèn di impuesto ku nos komunidat mes ta produsí, pa un total di alrededor di 1.5 miar pa aña. Durante Covid 19, no a drenta sufisiente sèn den kaha di Gobièrnu. Gobièrnu di Kòrsou sinembargo tin hopi propiedat, manera tereno i edifisio ku huntu bal vários miar i tambe “claims” riba instansianan ku debe Gobièrnu miónes. PIN ta mira kapitalisashon riba debenan na Gobièrnu i di algun di nos propiedatnan, komo un bon alternativa pa solushoná nos problema di likides. Tur propiedat di Gobièrnu ta propiedat di pueblo. Ora pueblo ta den nesesidat agudo, Gobièrnu tin e obligashon di solushoná e nesesidatnan ei pa pueblo. Nos no mester lubidá riba e sobre-likides di nos institutonan finansiero, ku por kumpra debenan di terser na Gobièrnu i paga Gobièrnu e sumanan konserní. Esei riba su mes lo generá a korto plaso e likides nesesario. Gobièrnu ta haña sèn den un tiru i por sigurá  kumplimentu ku su debernan koriente i  invertí den proyektonan pa stimulá ekonomia lokal, entre otro produkshon lokal di kuminda i infrastruktura, lokual ta baha salida di divisa. 

 

Den e mesun kuadro aki, ta nesesario pa flexibilisá atmishon di ekstranheronan ku ta kumplí ku e kriterionan pa e tipo di invershonnan ku nos ke stimulá, por ehèmpel den IT. Tambe mester invershon den proyektonan di produkshon lokal pa remplasá importashon i promové eksportashon di produkto i servisionan lokal. Pa esakinan por duna mas insentivo fiskal.  

 

Na di dos luga, pa stimulá ekonomia, Gobièrnu por instruí e kompanianan di gobièrnu pa aselerá invershonnan nesesario, pa por duna mas i mihó servisio. Esei lo generá trabou pa hopi hende den konstrukshon, infrastruktura i tèknologia. E invershonnan aki mes lo “spin-off” pa e otro sektornan ekónomiko. Trabou pa Yunan di Kòrsou ta nifiká ku sèn ta keda lora den komunidat i Gobièrnu ta generá entrada dor di risibí primanan ku trahadónan ta paga i impuesto riba entrada, riba entrada di OB i tambe riba ganashi di kompanianan lokal. Segun PIN e invershonnan nesesario di e kompanianan huntu por krea un inyekshon finansiero di miones den nos komunidat. E kompanianan por finansiá e invershonannan via institutonan finansiero, tantu lokal i den eksterior. Fiansanan hasí den eksterior lo fortifiká e reserva di divisa di Kòrsou, ku lo kompensá e huida di divisa via importashon di produkto i servisionan nesesario den sosiedat. Pa stimulá invershonnan dor di kompanianan privá, PIN ta proponé un rekorte di impuesto, konformé e suma invertí realmente den e kompania.

 

Na di tres lugá, Gobièrnu mester siguí baha gastu i siguí ku e trayektonan di redukshon di gastu den kuido (te aworaki a baha gastu ku 84 mion, pa por finansiá kuido mediko di CMC) i restrukturá e fondonan di salú i di labor di SVB pa salbarguardiá nan. Tambe, aselerá e reforma di belastèn rapidó i drecha e  atministrashon pa kobra lokual ta riba kaya. Den e kuadro aki por pensa riba un rebaho riba debe di impuesto pa esnan ku paga nan debe impuesto a korto plaso den un periodo determiná.

 

PIN ta reiterá, ku “sostené pa nos propio forsa” ta mes importante ku “e boluntat pa yuda otro”. P’esei, PIN ta sugerí Gobièrnu pa no pèrdè masha tempu mas i usa e proposishonnan di PIN, pa presentá pueblo un alternativa riba ambos posibilidat.  Ban pa bai!

This site uses Akismet to reduce spam. Learn how your comment data is processed.

error: Content is protected !!
%d bloggers like this: