Yuda ku amor i duna bo granito:  Buzon di kolekta pa Prinses Wilhelmina Fonds na tur brènch di Banco di Caribe

Yuda ku amor i duna bo granito: 

Buzon di kolekta pa Prinses Wilhelmina Fonds na tur brènch di Banco di Caribe

 

WILLEMSTAD: Manera ku pueblo di Kòrsou sá, Sèptèmber ta luna di kolekta pa Prinses Wilhelmina Fonds (PWF). E fundashon tin mas ku 70 aña yudando komunidat i pashèntnan di kanser. Nan a kuminsá e bataya kontra kanser na aña 1949, i den esaki ta brinda sosten na tantu e pashènt i su famia. PWF ta un organisashon ku ta dependé di kontribushon partikular. 

 

Den e luna di kolekta, PWF ta apelá na pueblo di Kòrsou pa sigui sostené e fundashon i su trabounan via di donashon. Klientenan di Banco di Caribe ya por a tuma nota di e buzon di kolekta di PWF na su brènchnan. Tur hende ta konsiente ku e situashon ekonómiko di nos pais tin su desafionan, i pa un fundashon ku ta dependé riba donashon pa sigui ehersé su trabounan, e ta bira difísil sin ayudo di komunidat. PWF a bin ta traha inkansablemente no opstante e situashon mundial ku nos tur ta bibando. 

 

Yuda ku amor i duna bo granito! 

Banco di Caribe ta enkurashá tur su kliente- i bishitantenan pa kontribuí na e luna di kolekta na momento ku bishitá e brènch prinsipal na Saliña, Sta. Maria, Otrobanda òf Sambil. Na kada brènch di Banco di Caribe tin un buzon di kolekta kòrá di PWF destiná pa depositá sèn aden. Pa esnan ku ke hasi un transferensia pa e fundashon, por hasi esaki riba number di kuenta di Banco di Caribe 15547301. No lubidá di ‘Yuda ku amor’ i duna bo granito na Fundashon Prinses Wilhelmina Fonds.

This site uses Akismet to reduce spam. Learn how your comment data is processed.

error: Content is protected !!
%d bloggers like this: