Site icon KIKO TA PASANDO NOTISIA I INFORMASHON

NA MEMORIA DI JAN CLARA Otro gran baluarte ta bai laga nos

Advertisements

 

NA MEMORIA DI JAN CLARA

Otro gran baluarte ta bai laga nos

 

WILLEMSTAD — Direktiva di AMAK a tuma nota di un notisia tristu ku e músiko Jan Clara, direktor di Combo C a bai laga nos.

 

Jan Clara a  militá den diferente agrupashon musikal manera Jovenes del Caribe, All Star Combo i despues e a lanta su propio agrupashon musikal ku ta Combo C. Combo C tabata un dje agrupashonan musikal ku den añanan 70 bini ariba tabata hopi popular den pueblo i nan tabata tin diferente hit ku tabata hopi gusta.

 

Aki nos ke manda palabranan di forsa tambe pa Stanley Reinilia un dje kantantenan prinsipal di Combo C di e tempu ei, ku a interpretá vários dje piesanan popular ku e banda. Ta bon pa nos menshoná aki ku den e Promé Festival di Tumba na 1972, Combo C a skor hopi haltu, ku Stanley Reinilia komo Promé Finalista.

 

Jan Clara tabata un personahe hopi amabel i  semper bai ku su sonrisa tabata disfrutá den e kaso aki na momento ku e tabata aktuando komo músiko.

 

Jan Clara tabata timbalero, korista i mester bisa ku último añanan, e tabata aktivo ketu bai primeramente den un grupo chikitu ku Eddy Mar, pero despues komo solista e tabata un entertainer ku tabata toka na vários sitio aki na Kòrsou.

 

Aparte di su méritonan riba tereno Farandulero, Jan Clara tabata gosa tambe di un popularidat enorme komo yudoka i riba tereno di tiru. Tambe ela yega di logra hopi éksito tantu komo deportista aktivo pero tambe instruktor.

 

Semper bai Jan Clara tabata demostrá ku físikamente e tabata den bon kondishon i ta p’esei su fayesimentu a kue tur hende un tiki di sorpresa. 

 

Direktiva di AMAK ke ekstendé palabranan di kondolensia na famianan i amigunan di Jan Clara i na Stanley Reinilia, miembro di direktiva ku tabata un dje artistanan prinsipal di Combo C.

 

Jan Clara sosegá na pas

 

Direktiva di AMAK

 

Exit mobile version