Kantidat máksimo di 15 alumno pa klas for di grupo 8
Kantidat máksimo di 15 alumno pa klas for di grupo 8
Geplaatst op 22 September 2020 dor di Ministerio Enseñansa, Siensia, Kultura & Deporte
WILLEMSTAD – Gobièrnu ta informá ku entrante djaluna 21 sèptèmber 2020, skolnan a introdusí pa grupo 8 di Enseñansa di Fundeshi i tur grupo di Enseñansa Sekundario un kantidat máksimo di 15 alumno pa klas pa un periodo di 4 siman. Esaki ta enserá ku den klasnan lo purba di tene mas tantu posibel un distansia di 2 meter entre alumnonan i entre e alumno i su maestro. E desishon akí a keda tumá den diálogo ku Direktivanan di Skol i Sindikato pa garantisá ku e desishon ta funshonal den práktika.
Na promé instante Gobièrnu a duna e direkshon pa bai te un máksimo di 25 alumno pa klas. Sinembargo, despues di a kaba di konsultá ku Direktivanan di skol i ekspertonan riba tereno di salubridat públiko, a yega na un akuerdo definitivo ku ta mas práktiko pa baha e kantidat te na 15. Kada skol i/òf instituto lo tin e posibilidat pa a base di e realidat ku e ta aden, duna kontenido na e medida akí dependé e konteksto di su klasnan. Esta teniendo kuenta ku entre otro e kantidat di alumno ku aktualmente tin den klas i grandura di e lokal disponibel.
Kada skol lo traha un planifikashon segun e situashon na su skol. Tin skol lo parti e grupo na 2 i duna dianan spesífiko pa kada grupo presentá na skol tur siman. Tin skol lo tin un grupo un siman i kaba e di dos grupo e siguiente siman. Riba e dianan ku no tin lès na skol, studiantenan lo risibí lès i kontenido pa por traha na kas teniendo kuenta ku e fasilidatnan i posibilidatnan ku un alumno lo por tin na kas. Tur skol lo tene kuenta ku alumnonan ku tin nesesidatnan adishonal.
Basá riba análisis di direktivanan enkuanto posibel retraso ku e situashon di krisis aki por tin riba Enseñansa, Ministerio di Enseñansa lo evaluá huntu ku direktivanan di skol, Inspekshon di Enseñansa i tambe den “4-Landen overleg ku otro paisnan den Reino” e impakto riba pruebanan i èksamen ku tin planiá i si mester hasi sierto adaptashonnan. Gobièrnu na tur momentu lo keda analisá e senarionan kon pa por hasi esaki di forma mas mihó na benefisio di kontinuashon di enseñansa pa tur alumno.