Diálogo den Enseñansa ta kontinuá pa ku situashon di COVID-19 

 

Diálogo den Enseñansa ta kontinuá pa ku situashon di COVID-19

Geplaatst op 27 September 2020 dor di Ministerio Enseñansa, Siensia, Kultura & Deporte

WILLEMSTAD –  Ministerio di Enseñansa, Siensia, Kultura i Deporte (ESKD) ta informá tokante kolaborashon ku ‘stakeholders’ den kuadro di COVID-19. Komo organisashon responsabel i teniendo kuenta ku e último akontesimientonan, nos ta tuma e situashon di pais den krísis na serio. Tim di Ministerio di ESKD ta reuní ku profeshonalnan di Ministerio di Salubridat Públiko, Naturalesa i Medio Ambiente kontinuamente pa por sigui traha na e trayekto pa un Enseñansa seif i sigur den tempu nobo di COVID-19.

Huntu a yega na akuerdo pa revishon di tur e desishonnan, medidanan di prevenshon i protokòlnan ku tin aktualmente. Esaki a palabrá huntu durante e reunionan pa ku e aktividatnan den e área na i rondó di skolnan. Tur informashon i datos sientífiko ta keda usá pa evaluá e trayekto i yega na un punto di salida komo tim ku ta traha na bienestar di hinter komunidat. Alabes ta informá ku a apuntá un persona spesífiko, un profeshonal di salubridat di e tim di EPI, pa ta e persona di kontakto pa ku asuntunan di Enseñansa, esta skolnan. Dokter Sandra Bouten lo guia e parti aki i ta disponibel pa kanalisá e trayekto komo punto di kontakto huntu ku e direktivanan di Skol.

Durante henter siman ku a pasa, Sektor di Enseñansa i Siensia a reuní tambe ku e representantenan sindikal pa asina tur informashon keda kompartí. Alabes a tuma ‘feedback’ i proposishon serka nan komo ku nan tambe ta ko-responsabel pa e aktividatnan den enseñansa komo representashon di trahadó.

Tur `stakeholder` ta keda involukrá den e trayekto, paso ta huntu nos ta yega na e mihó solushon kaminda ku e alumno ta sentral. Komo outoridat enkargá ku Enseñansa, Ministerio di ESKD ke pa komunidat keda trankil i konfia den e profeshonalnan ku ta traha na bienestar di komunidat kompleto i nos alumnonan en partikular, huntu ku tur direktiva di skolnan i kabes di skolnan.

Konsiderando kontenido di e diálogonan ku a tuma den konsulta ku aktornan, tur medida ku a keda tumá por lo pronto lo keda vigente. Semper bai Ministerio di ESKD tin oido pa kasonan partikular ku ta eksigí atenshon agudo i huntu ku e direktiva di skol lo tuma e medidanan nesesario pa atendé e situashon i garantisá trankilidat den tur área di Enseñansa.

Ministerio konserní