30 aniversario Dia Mundial di Nos Grandinan

30 aniversario Dia Mundial di Nos Grandinan

Skirbi pa: Drs. Melva Croes-Yánez
Awe dia 1 di october, 2020 ta e di 30 aniversario di Dia Mundial di nos Grandinan of miho bisa
esnan di tercer edad. Nos ta duna tur nos Grandinan un caluroso danki gradici nan pa nan aporte
durante nan bida, incluso nan sabiduria, inteligencia y esfuerso hinca den educacion di nan yiu,
nieto, famia y otronan. Awe nos comunidad ta agredicido na nos grandinan pa por disfruta di tur
e esfuersonan cu nos grandinan a y ainda ta regalando nos comunidad, especialmente na nos
hubentud.
E aña aki tambe nos por a sinti e existencia inespera di COVID-19, cu a provoca un shock y
comocion den henter mundo. Awe tambe nos mester para keto na tur nos grandinan cu mester
enfrenta riesgo grandi pa contagio y e consecuencianan cu esaki por trece cu ne, esta ansiedad,
depresion, miedo, problema cognitivo, etc.
Un tiki riba desaroyo di e dia di awe.
Riba 14 di december 1990, e Asamblea General di Nacionnan Uni a asigna 1 di october como
“Dia Internacional di derechonan di adultonan mayor di edad” (resolucion 45/106).
Na 2002, e Segundo Asamblea Mundial riba Enbehecimento a adopta e Plan di Accion
Internacional di Madrid riba Enbehecimento, pa enfoca riba e oportunidad y desafionan di
enbehecimento di poblacionnan den siglo XXI y pa promove desaroyo di un sociedad pa tur
edad.
Algun dato publica pa Nacionnan Uni.
Casi 1,000 miyon (mil miyon) di hende tin na mundo awendia cu edad di 60 aña of mas. Entre
2017 y 2030, ta pronostica cu e cantidad di hende di 60 aña of mas, lo crece cu un 46 por ciento,
esta di 962 miyon pa 1,400 miyon (mil cuatro shen miyon), superando asina e cantidad di
hobennan y mescos ta conta na nivel mundial pa mucha bou di 10 aña.
Segun informe di Nacionnan Uni, 2018 a bay den historia como e prome biaha, cu e
cantidad di hende di 65 aña of mas a supera e cantidad di mucha bou di 5 aña mundialmente. Ta
ser premira cu e cantidad di esnan di 80+ aña lo triplifica, di 143 miyon na 2019 pa 426 miyon
na 2050. (World Population Ageing 2019; United Nations New York, 2020).
E crecemento den cantidad di hende mayor di edad ta esun mas halto y mas rapido den
mundo den desaroyo cu Asia como e region cu e cantidad di mas halto di hende mayor di edad.
Mientras Africa lo enfrenta e mayor crecemento proporcional (den percentahe). Den Ibero-
2
America e debilidadnan ta entre otro: e cuidador, conscientisacion, salud, seguridad social y
discriminacion
Cu e desaroyo aki den mente, ta rekeri hopi mas atencion di particularmente gobiernonan
y comunidad pa e necesidad y desafio cu hopi di nos grandinan ta enfrentando. Sinembargo,
igualmente importante ta e contribucion esencial cu mayoria di e homber y muhernan di edadnan
avansa y vital, ainda, por sigui funciona den comunidad y tin e garantia adecua pa sigui funciona
(hasta sigui traha durante di pension, si nan por y ta desea ainda).
Derechonan Humano mester keda central den tur esfuersonan al respecto.
Algun desafio cu nos grandinan ta enfrentando y cu merece atencion urgente ta:
 E fenomeno di “Edadismo” y su desafionan pa nos grandinan. Un topico cu mi a enfoca
riba dje recientemente den un articulo.
 Falta di informacion confiabel tocante strategianan con pa biba un bida saludabel.
 Enfoca riba con pa optimalisa respet, norma y balornan pa nos grandinan serca hubentud
y viceversa, esaki pa yuda sera e bashi/distancia actual entre nos grandinan y hubentud.
 Bin hunto pa traha riba y adapta e ley di derechonan di adultonan mayor di edad pa
Aruba.
Lema di e aña aki ta: Enbehecimento ta un privilegio

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: