“Landsverordening Uitzonderingstoestanden”, kier wòrdu introdusí pa gabinete Rhuggenaath, supuestamente pa por kontrolá e brote di COVID-19

October 1, 2020 REDAKSHON

“Landsverordening Uitzonderingstoestanden”, kier wòrdu introdusí pa gabinete Rhuggenaath, supuestamente pa por kontrolá e brote di COVID-19

Ku asombro Frakshon di MFK den Staten a tuma nota ku gabinete Rhuggenaath ta malusá e pandemia di COVID pa introdusí e “Landsverordening Uitzonderingstoestanden”.

Ku e lei aki gobièrnu por dekretá un estado di emergensia i polis por drenta den bo kas sin ningun órden di hues. Minister por lanta loko i será un kanal di tv òf radio. Nos pueblo di Kòrsou ta pèrdè tur derechi pa manifestá i protestá.

Nos di Frakshon di MFK tin miedu ku e introdukshon di e lei aki Kòrsou ta kai den un diktadura, ku otro palabra ku e “Landsverordening Uitzonderingstoestanden” gobièrnu por trapa e derechi fundamental di nos pueblo sin ku korte di hustisia òf Staten por hasi nada.

Pa por duna un base legal na e medidanan pa evitá kontagio di COVID-19, gabinete Rhuggenaath no mester di e lei makabro aki, pa por limitá derechinan fundamental di pueblo pa bai fiesta òf misa, hasi deporte, kore outo, será negoshi òf skol etcetera.

Pa por kontrolá e brote di COVID-19 gobièrnu mester a simplemente modernisá e siguiente leinan;

Landsverordening openbare orde
Landsverordening rampenbestrijding
Quarantaine-verordening di aña 1931
Landsverordening bestrijding van besmettelijke ziekten di aña 1921

E leinan pa atendé karentena i malesa kontagioso, ta leinan ku tin mas di 100 aña di eksistensia.

Frakshon di MFK ta urgi gobièrnu pa sigui e konsehonan ku “Raad van Advies” a duna riba e tópiko aki. Pa atendé pandemia di COVID no mester introdusí “Landsverordening Uitzonderingstoestanden”.

Si gabinete Rhuggenaath ta haña ku huristanan den servisio di gobièrnu mester yudansa dor di e hopi trabou ku nan tin, lo por hasi uso di e servisio di kantornan di abogado. Gobièrnu tin kontrakt ku diferente bufete di abogado ku ta “family & friends” i por laga nan asesorá gobiernu huntu ku e huristanan den servisio di gobiernu.

Frakshon di MFK ta pidi gabinete Rhuggenaath stòp di tira santu den wowo di pueblo ku e lei aki ta un nesesidat den e tempu di ousteridat aki. Nos ta pidi medionan di komunikashon pa wak e lei aki ku wowo skèrpi, “Landsverordening Uitzonderingstoestanden” ta kita derecho di prensa liber na Kòrsou.

Frakshon di MFK den Staten ta kontra di “Landsverordening Uitzonderingstoestanden” i ta pidi pueblo di Kòrsou en espesial medionan di komunikashon pa protestá fuertemente kontra e lei aki.