RECORDANDO EDUARDO RAFAEL MAYA AGREDA MIHOR CONOCI COMO: LALO – MR. BUGLE E LEGENDARIO MAESTRO MUSICAL Y MIHO TROMPETISTA DI JAZZ COLOMBIA *17-01-1946       †25-09-2020

RECORDANDO EDUARDO RAFAEL MAYA AGREDA
MIHOR CONOCI COMO: LALO – MR. BUGLE

E LEGENDARIO MAESTRO MUSICAL Y MIHO TROMPETISTA DI JAZZ COLOMBIA
*17-01-1946       †25-09-2020

 

ORANJESTAD – Siman pasa Aruba a ricibi e tristo noticia cu e maestro musical y musico legendario Sr. Eduardo Maya a bay laga nos, lagando un tesoro musical atras. Pa conta un poco di e trayecto di e gran musico aki. Eduardo Rafael Maya Agreda a nace dia 17 di januari 1946 na Sandoná, Nariño na Colombia. 

Eduardo Maya yega Aruba na aña 1968. Ela contrae matrimonio cu Sra. Felipina Tromp, di cual a nace su 3 yiunan: Nancy, Cyntha y Eduardo Jr. Eduardo. E tabata wordo yama, el Maestro aki na Aruba y na su Pais, el Mejor Trompetista y pionero di Jazz Colombia.

Manera cu e noticia a drenta cu Eduardo Maya a fayece por a mira un gran cantidad di reaccion y palabranan di convivencia di parti musiconan tanto local como tambe internacional y muy particular di Colombia caminda e tabata conoci como un di e figuranan mas revelante di e musica di su region, trompetista, areglista y compositor. 

Den añanan 60 ela cuminsa lesnan di musica na su tera natal y despues na Pasto. E ta un famia di 8 ruman homber y na un edad hoben a muda pa Bogota caminda ela realiza su estudio di musica na e Universidad Pedagogica y e Conservatorio di e Universidad Nacional. Despues ela bay New York caminda ela siña e tecnica di improvisacion. Ora cu ela bolbe bek Colombia ela forma parti di diferente agrupacionnan musical famoso. Como tambe ela forma e banda Grupo Maya, cual tabata dedica na e ritmo salsa caminda ela graba dos album cu Philips y Fonobosa. Ela crea proyectonan propio di jazz y funk como Mister Bugle, Camara Jazz y su Caribbean Big Band cual a wordo lanta na Aruba despues cu ela yega y establece su mes. E tabata un artista musical cu a sa di destaca como explorador di e ritmonan manera Jazz latino, salsa y funk. 

Aki na Aruba cu su banda Grupo Maya, ela traha hopi aña na Concord Hotel Aruba y ultimo ela traha na Hyatt Hotel. Tambe ela comparti scenario cu diferente grupo y musico na casi tur hotel aki  na Aruba, Cas di Cultura, den Aruba Jazz and Latin Music Festival, Caribbean Sea Jazz Festival, Aruba Music Festival y hopi festivalnan mas local y internacional. Varios di nos artistanan local y como tambe international ela yega di comparti scenario, cualnan ta mucho hopi pa menciona.

Na un cantidad di ocasion Sr. Eduardo Maya a forma parti di orkesta nacional y a comparti su talento y demostra su stimacion pa nos pais y cultura durante manifestacion cultural riba Dia di Betico y Dia di Himno y Bandera riba Plaza Libertador Betico Croes.

Diabierna 2 di October ta bay ta su despedida, y despues nan lo hiba su shinishi Colombia, na unda ta bay tin un homenahe pe. Eduardo, su shinishi ta bay Colombia, pero su recuerdonan ta keda Aruba, na unda ela biba un gran parti di su bida y cu su curazon Arubiano.

Minister di Cultura Sra. Xiomara Maduro ta gradici su famia pa por a comparti Eduardo cu pais Aruba caminda ela comparti su talento musical alegrando y treciendo ambiente pa nos local y bishitantenan. Palabra di condolencia na su yiu Nancy, Cynthia y Eduaro Jr. y henter famia, amigo, conocinan, su ex-studiante- y coleganan musico.
Hopi forsa na e momento aki. Cu e legendario maestro musical Eduardo sosega na paz den Reino di Señor.

This site uses Akismet to reduce spam. Learn how your comment data is processed.

error: Content is protected !!
%d bloggers like this: