Inougurashon Mural i kambio di Nòmber Parke Himno i Bandera ‘Rudy’ Rooi na Barber.
Inougurashon Mural i kambio di Nòmber Parke Himno i Bandera ‘Rudy’ Rooi na Barber.
Geplaatst op 05 October 2020 dor di Ministerio Enseñansa, Siensia, Kultura & Deporte
WILLEMSTAD – Den kuadro di duna honor na nos herensia i historia, Gobièrnu di Kòrsou ta duna rekonosementu na nos hendenan. Djadumingu 4 òktober 2020, Minister President sr. Eugene Rhuggenaath den su kalidat komo Minister enkargá ku Kultura a anunsiá ku Parke Himno i Bandera awor lo karga e nòmber di e baluarte di Banda Bou Rutilio “Rudy” Rooi. Na e okashon aki a hasi inougurashon tambe di un mural dediká na “Rudy Rooi” den e Parke na Barber.
Den su palabranan di dedikashon, Minister Presidènt a deklará;
“Awe nos ke balorá e pionero, esun ku e pensamentu i vishon pa krea e espasio kultural aki. Rudy a komprondé ku ta solamente ku dedikashon, trabou duru i perseveransia bo ta logra bo metanan. E a konektá na personanan ku por a yuda i a duna un man pa realisá e soño akí. E a yuda Kòrsou kosechá e sitio kaminda nos ta pará awe i kaminda hopi memoria i momentunan balioso a keda selebrá. Rudy, na nòmber di pueblo di Kòrsou, nos ta yama Rudy danki pa tur loke bo a nifiká pa nos kultura, pa laga kultura biba den bida di grandi i chikí i pa demostrá balornan ku ta importante den nos komunidat. “
E inougurashon a tuma lugá komo parti di e reflekshon kultural durante siman di kultura 2020. Durante e mainta aki, a reina un dushi ambiente kultural i ekspreshon di kachu. Nos maestro di seremonia, sr. Gilbert Basilio, a guia e akto bunita aki. Tambe nos hóbennan Naomi Josephina a kanta Himno i Giandro Marcelia a presentá ku un poesia.
Un pabien na Rudy Rooi i na pueblo di Kòrsou.
Klik aki pa tuma nota di e diskripshon di e: Deskripshon Mural Rudy Rooi òktober 2020
Inougurashon mural na barber
Djadumingu 4 òktober 2020, Minister President sr. Eugene Rhuggenaath den su kalidat komo Minister enkargá ku Kultura a anunsiá ku Parke Himno i Bandera lo karga e nòmber di baluarte di Banda Bou Rutilio “Rudy” Rooi.
**Riba e fotonan athunto por tuma nota di Minister E. Rhuggenaath, Minister Z. Jesus-Leito i direktor di Sektor di Kultura i Deporte Lizette Sambo-Velder huntu ku sr. Rudy Rooi i famia na momento di desvelo di e borchi i mural na Parke Himno i Bandera Rutilio (Rudy) Rooi.
Pa mas potrèt klik aki: Album Inougurashon Mural Barber
