Konvokashon di reunionnan di Parlamento ta bai di forma desorganisá i sin ku miembronan di Parlamento ta haña sufisiente tempu pa prepará i hasi “research” pa debatí riba e puntonan di agènda ku ta wòrdu konvoká

 

Willemstad, 30 di sèptèmber 2020

 

Na: Presidente di Parlamento,

       Señora A. Pauletta

       Wilhelminaplein 4

       PRESENTE

 

Tópiko: Konvokashon di reunionnan di Parlamento ta bai di forma desorganisá i sin ku miembronan di Parlamento ta haña sufisiente tempu pa prepará i hasi “research” pa debatí riba e puntonan di agènda ku ta wòrdu konvoká

 

Señora Presidente,

 

Frakshon di MFK no por sigui akseptá e forma desorganisá ku bo persona ta konvoká reunionnan di Parlamento. Den e tiki tempu ku bo persona tin sinta komo Presidente di Parlamento nos mester konstatá ku bo no ta dispone di e kapasidat organisatorio ku un Presidente di Parlamento mester tin pa guia e kolegio aki.

 

Bo persona ta konvoká reunion pa ser trata den Parlamento di un dia pa otro, ku komo konsekuensia ku miembronan di Parlamento no ta haña tempu pa lesa i hasi “research” pa por debatí den Parlamento.

 

Frakshon do MFK ta pidi reunion riba temanan di importansia, konforme artíkulo 64 insiso 4 di Reglamento di Orden i bo ta ninga di konvoká e reunionnan aki, pero si bo sa di konvoká reunionnan ku gabinete Rhuggenaath i miembronan di Parlamento ku ta sostené gobiernu duna bo òrdu pa konvoká di un dia pa otro.

 

Pa medio di e karta aki frakshon di MFK un biaha mas kier kòrda bo riba dos reunion ku nos a pidi ku karakter di urgensia ku fecha 20 di ougùstùs i 31 di ougùstùs 2020, respektivamente nos frakshon a pidi pa konvoká ku karakter di urgensia reunion riba Oumento di Salario di Mandatarionan (OSM) i riba e “Caribische Hervormings Entiteit” (CHE).

 

Nos lo apresiá ku di e mesun forma ku bo ta yama reunion ora bo haña òrdu di gabinete Rhuggenaath, ku lo bo por pa konvoká e dos reunionnan aki tambe riba dianan 8 i 9 di òktober próksimo.

 

Atentamente,

 

Gilmar Pisas

Lider di frakshon di MFK