UN TREMENDO TRABOU DI NEGOSASHON KU HULANDA!

 

UN TREMENDO TRABOU DI NEGOSASHON KU HULANDA!

 

Frakshon di PAR tin nada mas ku elogio pa e manera balente i determiná ku gabinete Rhuggenaath a guia e proseso pa yega na un areglo satisfaktorio ku Hulanda. Ta un hazaña kompletu nos promé minister i su tim a laga mira atrobe. Pasó aparte di hèndel tur dia ku e krisis di Covid, ku ta e krisis di mas grandi ku suela di Korsou a yega di presensiá, i hèndel alabes ku futuro di nos refineria, gabinete Rhuggenaath a sa di kita e kuchú riba nos garganta poné dia 6 di yüli estilo di ‘tekenen bij het kruisje’ i negoshá den apenas 2 luna un akuerdo nobo ku Hulanda. Un akuerdo ku ahustenan signifikativo ku no mas ta mina nos outonomia i no mas ta violá legitimidat di nos órganonan demokrátiko. Un akuerdo di rèspèt mutuo ku partidonan madurá i serio a sera ku otro. Un akuerdo ku ta duna perspektiva pa no solamente sobrebibí e krisis di Covid, pero tambe reformá, fortifiká i desaroyá diferente sektor den nos kominidat den e añanan binidero inkluso e sektor sosial, di enseñansa i tambe infrastruktura. 

 

Pa e logro grandi aki Frakshon di PAR ta manda un felisitashon na henter gabinete Rhuggenaath. Pero en partikular un pabien ta bai na nos promé minister Eugene Rhuggenaath ku su tim negoshadó i nos minister di Desaroyo Ekonómiko i alabes vice promé minister Steven Martina. Tambe Frakshon di PAR ta manda un eligio i un pabien pa e sekretario di Estado Knops ku, despues di a kuminsa riba e pia robes, a sa di skucha ku empatia, mustra respet pa nos outonomia, konfia ku nos mes por guia nos mes pais i komprondé ku pidi yudansa na Hulanda no mester resultá den tumamento over pero mester resultá den trahamentu huntu na benefisio di e diferente pueblonan den Reino ku nashonalidat Hulandes. 

 

Ku e resultado aki riba mesa, ta na politikonan di Korsou awor pa mustra ku nan ke i por traha huntu ku Hulanda na bienestar di nos pais. Frakshon di PAR ta klá pa e reto ei.

 

______________________________________________________________

Stephen Walroud

Lider di Frakshon

This site uses Akismet to reduce spam. Learn how your comment data is processed.

error: Content is protected !!
%d bloggers like this: