E diesun (11) Parlamentarionan ku ta sostené gabinete Rhuggenaath awe den reunion ku e Sentral Sindikal Soladiridat a demostrá falta di rèspèt pa e Sentral Sindikal aki

 

 

Gilmar “Pik” Pisas

 

E diesun (11) Parlamentarionan ku ta sostené gabinete Rhuggenaath awe den reunion ku e Sentral Sindikal Soladiridat a demostrá falta di rèspèt pa e Sentral Sindikal aki

 

Ta di lamentá ku sindikalistanan di un sentral sindikal ta pidi Parlamento un reunion pa papia riba problemanan ku ta biba den nos komunidat i e diesun miembronan ku ta sostené gabinete Rhuggenaath ta opta pa no debatí ku e sindikalistanan i ta keda sin hiba palabra durante di e reunion aki.

 

Esaki ta muestra di falta di rèspèt pa e gremio sindikal, pero tambe pa e klase trahadó ku e sentral sindikal aki ta representá. E aktitut aki ta demonstrá un biaha mas ku e gobiernu aki i e Parlamentarionan ku ta sostené e gobiernu aki no ta dispuesto di elevá nos problemanan pa di bèrdat huntu ku tur “Stakeholders” nos por superá e retonan aki.

 

Frakshon di MFK ta kere ku e partidonan ku ta gobernando, esta PAR i MAN ta demonstrá un régimen di arogansia i deskriminashon ku nunka promé nos a konosé den gobernashon aki na Kòrsou. Lubidando ku ta e mesun klase trahadó ku e sentral sindikal aki ta representá ta esnan ku lo a vota pa bosnan ta sinta riba e stulnan di gobernashon aki.

 

Frakshon di MFK kier enkurashá e hóben Sentral Sindikal, aki pa no laga e tipo di aktonan aki kibra bosnan lucha. Laga e demonstrashon di arogansia aki di e diesun Parlamentarionan ku ta sostené gabinete Rhuggenaath ta e chispa pa bosnan kontinuá ku e bon trabou ku bosnan a bin ta hasi pa e klase trahadó.

 

Sentral sindikal Soladiridat a demonstrá ku bosnan ta un sentral sindikal ku no ta meskla bosnan trabou sindikal ku polítika i ku bosnan no ta mira kolo i/òf partido polítiko pa bosnan vosifera bosnan pensamentu riba situashonnan ku ta presentá den nos komunidat i mas ainda ora ta trata na trapa riba derechi di e klase trahadó.

 

Nos di frakshon di MFK si ta super satisfecho di por a debatí ku bosnan awe den sala di Parlamento i tardi òf tempran bosnan lo ta parti di e diskushonnan na nivel gubernamental pa duna bosnan opinion i sugerensia pa optimalisá i solushoná problemanan di nos dushi Kòrsou.

 

Ban laga nos Kurason sigui bati pa Kòrsou, debí ku poder di gobernashon ta algu relativo i no eterno, esun ku mal uza su poder di gobernashon awe lo wòrdu huzga dia 19 di mart próksimo.

 

Kòrsou 8 di òktober 2020,

 

Gilmar “Pik” Pisas

Parlamentario pa

frakshon di MFK

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: