Laga e generashon nobo disidí riba su futuro.
Laga e generashon nobo disidí riba su futuro.
Pa Trabou Pa Kòrsou (TPK) no tin motibu pa selebrá loke a pasa riba 10 òktober 2010. Ta konosí ku pa hopi siudadano e fecha aki ku mester a engrandese Kòrsou a bira un debakel dje generashon aki. Primeramente a primintí pueblo ku Kòrsou lo a haña un status aparte igual ku Aruba. Despues di 10 aña asta fanátikonan di 101010 no por mustra e avansenan pa Kòrsou. Entre otro e pakete di 5 lei di konsenso i un banko sentral kompartí, den kual St. Maarten ku apénas 14% tin mes tantu poder ku Kòrsou, ta ehemplonan di mal negoshashon. E proposishon pa bini ku un florin karibense i no un florin di Kòrsou ta otro ehemplo di falta di amor pa patria ku nos por mira bek den e resultadonan negoshá.
Calmes:”A yega tempu pa e generashon nobo tuma rienda”. Ta bisto ku tur e formanan di struktura estatal manera Antia Nobo i Antia Restrukturá a frakasá. Tabata insolito pa kere ku usando mes un hendenan di Antia Nobo i Antia Restrukturá lo a negoshá un outónomo den Reino na benefisio di pueblo di Kòrsou. Ta opvio ku e heridanan krea dor di fanátikonan di 101010 no por wòrdu kura dor di e propio okashonantenan.
Pa TPK a yega tempu pa un kambio grandi. E generashon nobo i sin renkor di TPK ta kla pa tuma rienda di su futuro. Esaki lo rekobrá e konfiansa pèrdí bek di pueblo i di Hulanda. TPK nunka por tuma Hulanda na malu ku nan si a negoshá ku kurason pa nan pais. Enbes di sigui krea mas divishon òf venená e pueblo TPK ta konvensí ku tin alternativa pa un forma di gobernashon nobo. E fecha 10.10.10 mester wòrdu usa pa reflehá kon nos tur ta bai yuda e generashon nobo kambia e rumbo ku Kòrsou ta bayendo.