Kòrsou ta drenta un etapa nobo

October 12, 2020 REDAKSHON

Kòrsou ta drenta un etapa nobo

Geplaatst op 11 October 2020 dor di Ministerio Asuntunan General i Promé Minister

WILLEMSTAD – Gobièrnu di Kòrsou su enfoke ta riba un etapa nobo. Esaki ta nos chèns pa berdaderamente kuminsá karga nos outonomia manera debe ser atraves di propio eskoho i aktuando riba nos propio forsa. E etapa nobo aki di reforma i desaroyo, ta habri oportunidat pa transformashon i bienestar berdadero di nos pais pa aki 10 i 20 aña ainda nos futuro generashon ta sinti e efektonan positivo di dje.

Pa logra esaki a negoshá konkretamente ku Hulanda pa:

Invertí den nos hendenan. Ta trata aki di e.o. kreashon di un mihó konekshon entre enseñansa i nos sektor laboral, kaminda e chèns pa hende kaba skol i haña trabou ta bira aun mas grandi, pero tambe invershon den material i otro rekursonan pa enseñansa. Un bon ehèmpel ta e montante di 60 mion florin komo donashon ku ta bai haña pa hinka den enseñansa mésora.
Negoshá ku Hulanda pa aparte di reformá, nos invertí prinsipalmente den e área sosial i ekonómiko. Ke men no ta papia mas di “Caribisch Hervormingsentiteit”, pero awor por papia di un órgano ku ta hasi tantu reforma komo desaroyo sosial i ekonómiko di Kòrsou.
E órgano di reforma i desaroyo lo konsistí tambe di por lo ménos un (1) persona ku afinidat pa nos realidat i ku ta aktua den konsultá ku nos Gobièrnu.
Nos outonomia no ta keda miná. A sòru pa e lei di konseso no ta para den nos kaminda demokrátiko. Gobièrnu di Kòrsou, pero sigur Parlamento su ròl ta keda respetá.
Ta trata di un lei di Reino ku durashon di 6 aña total. Una bes e 6 aña aki pasa, outomátikamente e lei ta tèrminá. Ke men no tin mester di yega na un konsenso pa chèk si esaki por tèrminá òf no. A logra si pa añadí un evaluáshon aki 3 aña pa wak kon ta bayendo.
Pa por bin na remarke pa e fondonan nesesario, nos mester yega na un agènda di ehekushon i finalmente e ehekushon ta keda den nos mes man trahando huntu ku e órgano di reforma i desaroyo. Esaki semper ta keda presentá na Parlamento di Kòrsou promé ku e keda ehekutá.
E reto di likides ta keda atendé una bes firma un akuerdo polítiko i kumpli ku e eksigensianan akordá.

Djasabra mardugá, 10 di òktober – riba dia ku Kòrsou a kumpli 10 aña komo pais outónomo den Reino Hulandes – Promé Minister Eugene Rhuggenaath huntu ku Minister Steven Martina a duna informashon amplio i debatí riba e Lei di Reino, e órgano di reforma i desaroyo, pero tambe tokante e pakete di reforma i invershon. Ku un mayoria di voto, Parlamento di Kòrsou a bai di akuerdo pa entre otro duna Gobièrnu e sosten nesesario pa por terminá e negosiashonnan ku Hulanda.

E siguiente paso promé ku nos yega na un akuerdo definitivo lo ta, pa presentá e totalidat di e negosiashonnan aki na ‘Raad van State’ pa asina risibí nan punto di bista riba esaki. Pa e presentashon aki tambe, Gobièrnu di Kòrsou a sòru di entregá pregunta i puntonan aklaratorio pa garantisá ku Kòrsou su interes ta bon salbaguardiá. Mientrastantu, Kòrsou ya por kuminsá risibí sosten kumpliendo ku e kondishonnan mará na e di dos i di tres transh.

Ku satisfakshon i speransa nobo nos por dal un stap mas den inisio di un etapa nobo pa Kòrsou. Un etapa ku yen posibilidat pa desaroyo di e pais ku nos tur kier mira realisá.