Petishon pa un reunion di komishon sentral konforme artíkulo 33 di Reglamentu di Orden (RvO) ku komo punto di agènda, “Kuantu realmente Kòrsou a pèrdè ku e aventura ku gabinete Rhuggenaath a bai ku e kompania priva Insel Air”

 

Na: Presidente di Parlamento

Señora A. Pauletta

Wilhelminaplein # 4

PRESENTE

 

Tópiko: Petishon pa un reunion di komishon sentral konforme artíkulo 33 di Reglamentu di Orden (RvO) ku komo punto di agènda, “Kuantu realmente Kòrsou a pèrdè ku e aventura ku gabinete Rhuggenaath a bai ku e kompania priva Insel Air”

 

Kòrsou, 13 di òktober 2020

 

Señor Presidente,

 

Frakshon di Movementu Futuro Kòrsou (MFK), pa medio di esaki kier pidi bo pa yama un reunion di komishon sentral ku e tópiko ariba menshoná. 

 

Frakshon di MFK a keda sorprendé di mira kontestanan riba Insel Air ku Minister di VVRP a manda pa un siudadano riba preguntanan relashoná ku diferente aspekto di e drama di Insel Air.

 

Frakshon di MFK ta kere ta bon pa miembronan di gabinete Rhuggenaath bin den Parlamento awor ku tin fallisiment di Insel Air pa asina informá Parlamento i pueblo di Kòrsou kuantu sèn Kòrsou a pèrdè ku e aventura aki di gabinete Rhuggenaath di hinka sèn di belasting di komunidat den un entidat priva.

 

P’esei pa e okashon aki nos kier pidi Presidente di Parlamento pa invitá e curator Mr. Rogier van den Heuvel, Ministernan Zita Jesus-Leito di VVRP, Steven Martina di MEO i Kenneth Gijsbertha di finansa na e reunion aki, pa duna Parlamento e informashonnan nesesario.

 

Na nòmber di frakshon di MFK,

 

____________ ____________ ___________

Gimar Pisas Gilbert Doran Juniël Carolina

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: