Situashon hopi peligroso riba karetera di Zapateer

 

Willemstad, 14 di òktober 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di VVRP, señora Zita Jesus-Leito.

 

Danki pa e koperashon.

 

Atentamente,

 

Juniël Carolina

Parlamentario pa

frakshon di MFK

Minister di VVRP

Señora Zita Jesus-Leito
PRESENTE

 

Kòrsou, 14 di òktober 2020


Tópiko: Situashon hopi peligroso riba karetera di Zapateer

 

Minister Jesus-Leito,

 

Pa medio di esaki suskrito Juniël Carolina, miembro di Parlamento di Kòrsou pa frakshon di MFK ta aserka bo persona komo minister enkargá ku Tráfiko, Transporte i Planifikashon Urbano (VVRP) ku e siguiente preguntanan pa un posibel solushon pa loke ta trata un karetera hopi peligroso den area di Zapateer.  

 

Frakshon di MFK den parlamento a wòrdu aserka dor di algun habitante di Zapateer ku nan parsela ta keda kantu di kaminda den un bògt di un via públiko i ku konstantemente outomobilistanan ta pèrdè kontrol i bai aksidentá kontra di nan propiedat. Ya ta mas ku 17 biaha ku outo a aksidentá den e mesun kas riba e kaminda menshoná. 

 

E abitantenan a sigui splika ku téknikonan di DOW kada bes despues di un aksidente ta bin tuma nota di e situashon, pero niun akshon nos ta ser tumá. E abitantenan aki ta biba hopi spanta i insigur pa loke ta trata e situashon aki i mester hasi algu promé ku un aksidente fatal tuma lugá.

 

Frakshon di MFK den parlamento ta hopi preokupá ku e situashon aki kaminda konstantemente vehíkulonan ta bai aksidentá den e mesun kas, hasiendo uzo di artíkulo 96 di reglamentu di órden mi ta aserka Minister ku e siguiente preguntanan;

 

Minister ta na altura di aksidentenan ku konstantemente ta tuma lugá na Zapateer kual ta parselanan ku ta Kv. 33, 25, 27 i 29 a yega na un total di 17 aksidente?

 

Señora minister por splika kiko ta e motibu ku te ainda e situashon aki no a wòrdu remediá?

   

Señora minister por informá Parlamento ki dia ta laga remediá e situashon aki mas lihé ku ta posibel?

 

Señora Minister por informá parlamento ku tin mas di e situashon nan aki, ku ta similar ku esun di Zapateer i ki dia ta laga remediá esakinan tambe?

 

Na nòmber di abitantenan di Zapateer, suskrito ta spera ku señora minister ta remediá e situashon aki mas pronto ku ta posibel i asina e abitantenan preokupá por sigui ku un biba normal di sin stress, sin miedu i sin preokupashon ku un dia ku un outo lo por drenta nan kas.

 

Atentamente

 

Juniël Carolina

Parlamentario pa 

frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: