Relashoná ku e kaso lamentabel pa motibu di mal tempu ku un piskadó a bin fayesé na pir di piskadó.

Relashoná ku e kaso lamentabel pa motibu di mal tempu ku un piskadó a bin fayesé
na pir di piskadó,

Meteo ta duna un relato kòrtiku di e akontesimentu di e mal tempu.
Primeramente Meteo kier a ekstendé su palabranan di kondolensia na famianan di e
persona ku a pèrdè su bida den laman brutu na Westpunt. Pa Meteo mes tambe kada
impakto di fenómenonan di naturalesa ku surgi riba nos isla kaminda tin pèrdida di
bida, tin su efekto riba nos komo servisio. Pero alabes ta mustra ku huntu nos por
kontribuí na redusí impakto di wer severo, protehando bida i propiedat.
Investigashon preliminar ta indiká ku pa lokual ta trata e área di mal tempu ku a
aserka Kòrsou durante di djamars último, Servisio Meteorológiko Kòrsou a hasi
menshon di e posibilidat pa mal tempu for di djaweps siman pasa den e pronóstiko di
5 dia. Asina Meteo a bin ta mantené e posibilidat pa mal tempu durante djamars i
djárason.
Djaluna mainta den e boletín semanal ku Servisio Meteorológiko Kòrsou ta presentá
riba retnan sosial i tambe medionan di komunikashon a indiká ku ta antisipá wer
aktivo ku ta kontené welek i bos durante di djamars i probablemente djárason.
E tipo di mal tempu aktivo manera a alkansá nos isla durante djamars atardi, ta
sistemanan di wer ku ta difísil pa pronostiká dianan promé, i tin un durashon entre di
4 pa 6 ora (squall lines). Pues ku otro palabra e ta difísil pa emití un alerta hopi ora
mas delantá promé ku tipo di sistemanan asina aki alkansá nos isla. Di otro un banda
siklonnan tropikal tin durashon di algun dia te ku algun siman, pues e tempu pa por
alerta un pueblo ta muchu mas largu promé ku e sistema alkansá e área di interes.
Servisio Meteorológiko a vigilá e área di mal tempu durante di djamars mainta, na
momentu ku tabata tin un área di mal tempu west di e isla di Aruba ku tabata move
lentamente den direkshon ost. Despues di 2:00 or trai mèrdia e wer ku ta konsentrá
riba e isla di Aruba tabata duna indikashon ku e lo no bai debilitá mas pero lo sigui
desaroyá i move den direkshon di Kòrsou i Boneiru. Na e momentu ei Meteo a
kuminsá tuma kontakto ku entre otro “havenmeester” di Kòrsou i sektor di aviashon.
Alrededor di 2:30 or trai mèrdia Meteo a emití su promé boletin speshal di
prekoushon pa posibel mal tempu pa media i públiko. E kanalnan di komunikashon ku
a wòrdu usa pa emití alerta ta inkluí: whatsapp (5601089), email, Facebook, wèpsait i
notifikashon riba Curacao weather App. Na momentu ku e wer tabata aserka e isla di
Kòrsou, esaki a sigui intensifiká rápido. Pa e motibu aki Meteo a emití un di dos
boletin speshal “vigilansha” (Kódigo Oraño 15:35) pa mal tempu. Na momentu ku e
área di wer a yega e parti sùit i sùitwèst di Kòrsou, e wer di mas aktivo a krusa riba e
parti west di e isla.
E kantidat di yobida ku a keda registrá na Soto ta 19 mm i 15 mm na Hato. Pa lokual
ta trata rafaganan di bientu durante pasashi di e sistema, Meteo a registrá un máksimo
di 31 nudo (55km/o) for di direkshon west. Bebi na e direkshon west di bientu e
impakto mas grandi tabata riba e kondishon di laman na e parti west i sùitwèst di
Kòrsou.
Meteo lo sigui hasi lo máksimo usando teknologianan moderno pa brinda pueblo di
Kòrsou informashon verídiko, konfiabel i na tempu asina garantisá ku pueblo ta bon
informá pa tuma akshon nesesario relashoná ku mal tempu, kumpliendo ku Meteo su
mishon: Vigilando wer 24/7 pa protehá bida i propiedat. Meteo ta sigui
enkurashá tur hende interesá pa registrá pa risibí boletin speshal via di nos
Whatsapp (+59995601089)