Karta pa Prome minister sr E.Rhuggenaath.

 

Na Konseho di Minister di Pais Kòrsou
ku intervenshon di sr. Eugene Rhuggenaath, Promé Minister.
Fort Amsterdam # 17
Presente
Referensia: Petishon na Konseho di Minister.
Apresiado sr Rhuggenaath,
Ku un grado haltu di rèspèt i apresio pa tur e esfuersonan di aktual Gobièrnu di Pais Kòrsou ku sr.
Rhuggenaath ta presidí, nos, èks empleadonan di Refineria Isla B.V. ku a lanta un koperativa pa sigui operá
e planta di refinashon di petroli i tambe e kompleho di almasenahe di krudo i derivado di krudo na
Bullenbaai pa medio di e karta aki ke trese un petishon di sumo urgensia dilanti na Gobièrnu.
Nos petishon ta regardá un yamada serio i urgente na Gobièrnu, pa hasi posibel ku Refineria Isla B.V. por
hasi uso di su fondonan pegá na Girobank N.V. I di otro banda kita e beslag ku RDK tin pone riba tankinan
ku produktonan almasená.Si Gobièrnu hasi dícho akshon e kompania por paga su èks trahadónan i
penshonadonan loke nan tin derechi riba dje. Tur esnan ku ta dependiente di e akshon aki ta yunan di tera,
kompatriota, ruman, primu, prima, tata, tanta, tio, subrino, subrina, famia, amigu, amiga, konosí, ser kerí,
ihá …enfin tur ta nos prohimo i nan ta padesiendo bou di e sirkumstansha ku refineria ta será i e almasenahe
na Bullenbaai no ta operando na su kapasidat.
Tumando na konsiderashon ku pueblo di Kòrsou den su totalidat ta sufriendo di e pandemia COVID-19 kual
a kousa kaída signifikante di aktividat ekonómiko, aún mas e petishon ku nos ta hasi na Gobièrnu ta bira
nesesario pa keda kumplí. Den nòmber di Dios Tata Santu i na nòmber di tur hende na Kòrsou ku ta
sufriendo di e situashon kaminda ku refineria ta será i COVID-19 ta asotá, nos ke reítera nos petishon na
Gobièrnu di Pais Kòrsou i nos Minister Presidente ku ta liderá gobernashon aktualmente.
Nos ta spera sinseramente ku nos petishon lo keda risibí ku e beneplásito nesesario i ku sr. Rhugennaath i
kolega ministernan lo trat’é seriamente ku e sufrimentu di pueblo di Kòrsou den mente.Ku bon dios
bendishoná sr. Rhugennaath i duna bo persona i bo koleganan e sabiduria i miserikòrdia nesesario pa honra
nos petishon pa asina Pueblo di Kòrsou no sigui sufri mas di e malestar ekonómiko ku seramentu di
refineria a okashoná.
Atentamente,
Na nòmber di tur èks empleadonan di Refineria Isla B.V. i tambe di Direktiva Koperativa di produkshon
refineria Isla.
A.C.de LaPaz      S.Kleinmoedig      Frenciss Lourens.

This site uses Akismet to reduce spam. Learn how your comment data is processed.

error: Content is protected !!
%d bloggers like this: