Desvelo Mural na Honor di Sra. Enith Brigitha

Desvelo Mural na Honor di Sra. Enith Brigitha

Geplaatst op 26 October 2020 dor di Ministerio Enseñansa, Siensia, Kultura & Deporte

WILLEMSTAD – Gobièrnu di Kòrsou ta duna honor na nos mes hendenan i den e kuadro aki a desvelá un mural dediká na nos héroe nashonal sra. Enith Brigitha. A ehekutá e trayekto aki den estrecho koperashon ku Fundashon Desaroyo Deportivo Kòrsou (FDDK). Minister enkargá ku deporte sr. Eugene Rhuggenaath, a desvelá e mural aki na e pisina na Sentro Deportivo Kòrsou (SDK) na Brievengat.

Enith Brigitha, komo yu di Kòrsou, a representá Hulanda partisipando na Olimpiada na añanan 1972 i 1976. El a gana medaya di bròns den e deporte di landamentu den kategoria di ‘Free Style’ pa 100 i 200 meter. Tambe el a keda skohé komo deportista femenino di aña na Hulanda na añanan 1973 i 1974. Remarkabel ta ku e ta e promé persona di koló ku a gana un medaya na Olimpiada. Esaki ta demostrá ku nos mes hendenan ta sobresalí den vários ramo. Mirando esaki, Gobièrnu ta pone enfasis na nos mes hendenan ku ta ‘role model’ pa nos hubentut.

Sra. Enith Brigitha a ekspresá palabranan di gratitut i a keda sumamente kontentu ku e gran honor. Den e video athunto por tuma nota di su palabranan.

Tambe Minister Rhuggenaath a mustra riba e balor di deporte pa desaroyo di hende disipliná den nos komunidat. Jhomar Loaiza a pinta e mural i a sa di proyektá e imágen di nos deportista na momentu ku e ta prepará pa kompetí.  Gobièrnu di Kòrsou ta keda duna balor na nos mes hendenan konformé e Programa di Gobernashon. Meta di esaki ta entre otro pa stimulá desaroyo atraves di apresio i rekonosementu pa asina forma un nashon positivo.

Athunto e biografia di Enith Brigitha:

 

**Riba e potrètnan athunto por tuma nota di e momento kaminda minister E. Rhuggenaath ta hasi e desvelo na SDK.

 

 

Ministerio konserní