Delegashon di MFK tabata di bishita serka gerensia di Curinde

Delegashon di MFK tabata di bishita serka gerensia di Curinde

 

Djamars 27 di òktober 2020, un delegashon di MFK ku a konsistí di Gilmar Pisas, lider polítiko di MFK i Sithree van Heydoorn presidente di MFK a hiba kombersashon ku gerensia Curinde.

 

MFK a sera konosí di aserka ku e organisashon dinámiko i ku trahando duru pa trese mas diversifikashon den e area di zona liber pa logra mantené i subi e aktividatnan aki den e area ekonómiko aki ku tambe a ser afektá finansieramente i ekonómikamente durante di e último añanan.

 

Di un forma kreativo i hasiendo uzo di teknologia moderno gerensia di Curinde ta trata na generá otro forma di hasi negoshi pa por keda kompetitivo den e area di Caribe pero tambe den e merkado merikano i europeo.

 

Tabata un plaser a por a skucha ku apesar di e tempunan difísil ku mundu ta pasando aden ku te ainda tin hopi interes di kompanianan tantu lokal komo internashonal ku ta interesá den hasi uzo di e fasilidatnan i servisio ku Curinde ta brinda. MFK sigur lo tene kuenta ku e vishon ku Curinde a presentá na nos i te kaminda ku nos por, MFK lo duna su kontribushon pa e vishon aki ser realista na benefisio di Kòrsou. 

 

Pa medio di esaki, MFK kier gradisí señora Jansen i su staf pa e forma profeshonal ku Curinde a demostrá di ta hasi nan trabou i pa e oportunidat brinda na nos organisashon polítiko pa por a risibí informashon hopi balioso.

 

Gilmar “Pik” Pisas

Lider Polítiko di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: