Prome Minister Evelyn Wever-Croes: UPDATE ULTIMO DESAROYONAN DI COVID-19: “Ban sigui cu nos disciplina y cordialidad cu ta e yabi pa nos exito”

 

Prome Minister Evelyn Wever-Croes:

 

UPDATE ULTIMO DESAROYONAN DI COVID-19:

“Ban sigui cu nos disciplina y cordialidad cu ta e yabi pa nos exito”

 

Dialuna mainta, Prome Minister Evelyn Wever-Croes a habri conferencia di Prensa di Gobierno di Aruba dunando un actualisacion di e ultimo desaroyonan di Covid-19 pa Aruba te cu 9 di november 2020. Pa loke ta trata e anochinan pa duna informacion, Prome Minister a duna di conoce cu Crisis team di Gobierno ta ahusta e schedule den cual ta duna actualisacion y updates di e pandemia. Desde awo, pueblo lo ricibi actualisacion y updates durante conferencianan di prensa regular di Gobierno Aruba. 

 

Prome Minister a enfatisa cu despues di a tuma algun medida severo, awo por bisa cu e situacion ta bou di control. E di dos ola cu Aruba a haña na augustus aworaki ta controla. E di dos ola a cuminsa na comienso di augustus y a yega un peak dia 16 di september cu 1630 caso activo. 1 di october e la bira 644 caso. 1 di november e tawata na 155 caso y pa 8 di november e tawata na 176 caso activo. Nos a logra di ‘crush the curve’ y aworaki nos ta purba di ‘flatten the curve’ pero a keda pega net bou di 200 caso activo pa dia. Desde 13 di maart nos tin 4606 caso positivo di cual mayoria a recupera. 

 

“E casonan activo ta variando entre 150-170 pa dia den e ultimo siman y esaki nos ta considera controlabel pero e peliger no a pasa ainda. E desaroyo aki ta uno remarkable y esaki ta danki na e sosten y nos ‘frontliners’ cu a traha incansablemente pa por atende cu esaki y di nos comunidad cu a comprende e seriedad y tin e disciplina”, Prome Minister a expresa. 

 

Aruba a logra crush the curve cu medidanan basta pisa entre otro, e toque de queda cu despues a cambia den un ‘prohibicion pa zona’. Controlnan di cuarentena y isolacion a bira mas estricto. Ta cera establecimento di esnan cu no ta cumpli cu reglanan manera e regla di tapaboca cu a wordo introduci den tur establecimentonan paden. 

 

“Berdad esaki ta un situacion cu tin hopi hende cansa, pero tanten cu no tin vacuna nos mester keda cauteloso, nos mester keda cuidadoso pasobra un descuido nos por perde control atrobe. Ta hopi importante pa nos sigui cuida nos mes pasobra apesar cu nos a cuminsa ‘crush the curve’, si nos mira cuanto persona tin den hospital y cuanto a fayece ta duna bo un otro bista.  Ainda tin hende den hospital y den intensive care y nos ta na un total di 41 hende cu a fayece cu ta hopi doloroso”, Prome Minister a enfatisa. 

 

Prome Minister a enfatisa e importantancia ta pa sigui haci mas esfuerso p’asina evita mas casonan fatal. Ban cuida nos mes y cuida esnan mas vulnerabel. Nos mester sigui aplica e reglanan di higiene, di laba man y aplica handsanitizer, tene distancia, no duna man ni parti sunchi y uza tapaboca pa tapa boca y nanishi. Y si bo tin sintoma keda paden y yama bo dokter pa e guia bo. 

 

Prome Minister a enfatisa: “Aworaki nos ta drentando den e fase pa reactiva nos economia y pa siña biba cu loke ta Covid. Nos mester siña biba cu ne di mainta cu nos lanta te anochi cu nos bay drumi. Nos mester cuida nos mes, nos famia y esnan mas vulnerable paso ta aisna so nos por sigui controla esaki. Un descuido chikito por pone cu ta perde ful control di e situacion. Aunke Aruba ainda no ta for di e area di peliger ainda y p’esey mi ta haci un apelacion fuerte na ciudadanonan di pais Aruba pa sigui cuida nan mes. 

 

Fin di siman tras di lomba tawata tin un cantidad grandi di vuelonan cu a bin Aruba bek. No ta manera antes pero si ta duna un indicacion cu nos ta bayendo bek den bon direcion. Mas nos cuida mas nos por enfoca riba reactiva nos economia y ricibi nos turistanan y esaki lo catalisa e desaroyo di nos pais. Ban sigui cu nos disciplina y cordialidad cu ta e yabi pa nos exito. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: