Tur persona ku biaha for di un pais di riesgo haltu mester keda den karentena obligatorio

Tur persona ku biaha for di un pais di riesgo haltu mester keda den karentena obligatorio

Geplaatst op 09 November 2020 dor di Ministerio Asuntunan General i Promé Minister

WILLEMSTAD – Komo un di e medidanan ku Gobièrnu di Kòrsou a instituí kontra plamamentu di COVID-19, tur pasahero i tambe residente ku biaha pa Kòrsou for di un pais di riesgo haltu mester bai den karentena obligatorio. E karentena obligatorio aki ta konta tambe na momentu ku e pasahero òf residente biaha pa Kòrsou di tránsito via di un pais di riesgo mas abou. Den kaso ku e pasahero òf residente ku ta biaha for di un pais di riesgo haltu, keda mínimo dieskuater (14) dia na e pais di tránsito promé ku e sigui biaha pa Kòrsou, e karentena obligatoria lo no ta nesesario.

Den fin di siman tras di lomba, Gobièrnu di Kòrsou a tuma nota di un situashon kaminda un residente a biaha pa Kòrsou for di un pais di riesgo haltu i a pasa tránsito via di un pais ku riesgo moderá. E residente aki a keda ménos ku dieskuater (14) dia na e pais di tránsito i a biaha pa Kòrsou huntu ku un persona ku no ta residente. Den e kaso spesífiko aki, ámbos persona mester keda den karentena obligatorio. Diferensia ta, ku e residente por opta pa hasi e periodo di karentena na su kas i persona no-residente ku a biaha kuné mester keda e periodo aki na un lugá asigná pa Gobièrnu.

Un persona ku ke biaha pa Kòrsou for di un pais di riesgo haltu mester risibí un eksonerashon promé di parti di Gobièrnu di Kòrsou. Aplikashon pa e eksonerashon aki ta sosodé via www.gobiernu.cw/reisverificatie. Na momentu ku un persona apliká pa e eksonerashon, e ta firma ku e ta bai di akuerdo tambe ku tur e reglanan stipulá i gastunan mará na esaki. Un di e reglanan aki ta e regla pa kumpli ku e periodo di karentena obligatorio. Posibel gastunan mará na e periodo di karentena aki, ta pa responsabilidat di e pasahero. Den e kaso spesífiko di fin di siman, e persona a bai di akuerdo ku e reglanan, e gastunan embolbí i a firma pa esaki tambe.

Un persona ku ta bini Kòrsou for di un pais ku riesgo moderá, no mester bai den karentena obligatorio. Máksimo 72 ora promé ku e buelo, e pasahero aki mester hasi un tèst di PCR, ‘upload’ e resultado negativo riba www.dicardcuracao.com i yena e Passenger Locator Card digital. Mester hasi e PCR tèst na un laboratorio rekonosé i únikamente ku un resultado negativo bo por biaha pa Kòrsou.

Por último, si bo ta bini di un pais ku riesgo abou, bo por biaha pa Kòrsou sin restrikshon. Bo mester yena e Passenger Locator Card digital i alabes bo mester kumpli ku tur e eksigensianan vigente pa ku COVID-19 na Kòrsou. Un lista aktualisá di e pais di teritorionan basá riba riesgo ta disponibel tantu riba e página di Facebook i Instagram komo tambe riba e wèpsait di Gobièrnu di Kòrsou.

Ta importante pa nos tur ta konsiente ku e reglanan ku Gobièrnu di Kòrsou a stipulá, ta pa protehá nos komunidat kompleto kontra kontagio i malesanan kousá pa e vírùs di Corona. Den e kaso aki e reglanan ta spesífikamente dirigí riba limitá importashon di e vírùs òf evitá ku personanan ku tin e vírùs di COVID-19 ta drenta nos pais i e ta konta pa tur hende.

Ministerio konserní 

This site uses Akismet to reduce spam. Learn how your comment data is processed.

error: Content is protected !!
%d bloggers like this: