Minister ta hasi entrega di Ordenansa na UoC i UDC pa e proyekto Studia den Region
Minister ta hasi entrega di Ordenansa na UoC i UDC pa e proyekto Studia den Region
Geplaatst op 12 November 2020 dor di Ministerio Enseñansa, Siensia, Kultura & Deporte
WILLEMSTAD – Minister di Enseñansa, Siensia, Kultura i Deporte sr. Eugene Rhuggenaath resien a hasi entrega di e ordenansa ministerial na Universidat di Kòrsou (UoC) i University of the Dutch Caribbean (UDC). Esaki den kuadro di ehekushon di e trayekto pa e Programa Pre-Akadémiko di UoC i e trayekto di digitalisashon di UDC pa ku enseñansa avansá relashoná ku e proyekto Studia den Region.
Den kuadro di ehekushon di e akuerdo di traha huntu pa ku e proyekto Studia den Region (2018-2020), Hulanda ta pone un kantidat di 1.3 mil disponibel pa stimulá estudio na Kòrsou i den region. Meta di e proyekto ta pa dal paso pa yega mas serka di un maneho ku orientashon nashonal i regional. Último añanan a usa fondonan disponibel pa interkambio di konosementu i finansiamentu di estudio pa studiantenan di Kòrsou i den region na nivel di HBO/WO.
Teniendo kuenta ku e último desaroyonan den kuadro di COVID-19, awor akí por usa e fondonan disponibel pa otro trayektonan na benefisio di enseñansa avansá na Kòrsou i nos studiantenan. Vários studiante a keda stagná of a posponé nan estudio den eksterior pa motibu di e pandemia ku mundu ta pasa aden aktualmente. Na mes momentu e situashon di e pandemia a trese kuné ku e interkambio di konosementu, biahe di estudio i stazjenan den eksterior/region no por a keda ehekutá. Esaki a pone ku awor lo bai usa e fondonan pa stimulá finansiamentu di estudio na Kòrsou óf den region pa studiantenan lokal pa estudio na nivel di HBO/WO i finansiamentu di un Programa Pre-akadémiko (UPAP) na UoC pa studiantenan di e aña eskolar 2020-2021 ku no ke, ni por bai studia den eksterior. E studiantenan ku ta partisipá na e Programa Pre-Akadémiko ta haña un laptop i un programa speshal pa prepará nan pa e próksimo aña. Tambe lo finansiá prosesonan di digitalisashon di enseñansa avansá (UDC) i desaroyo di un sistema di registro struktural ku informashon relevante pa ku enseñansa avansá na Kòrsou.
Riba djamars 10 di novèmber 2020, Minister di Enseñansa, Siensia, Kultura i Deporte sr. Eugene Rhuggenaath a hasi entrega di e ordenansa ministerial na UoC pa ehekushon di e trayekto pa e Programa Pre-Akadémiko i na UDC pa e trayekto di digitalisashon pa ku enseñansa avansá. Tambe dos alumno di e Program Pre-Akadémiko a bin di bishita serka Minister di ESKD pa kompartí parti di nan eksperiensia. E trayektonan ta keda ehekutá den estrecho koperashon ku Ministerio di Enseñansa, Siensia, Kultura i Deporte.
Entrega di MB na UoC i UDC
Minister di Enseñansa, Siensia, Kultura i Deporte sr. Eugene Rhuggenaath resien a hasi entrega di e ordenansa ministerial na Universidat di Kòrsou (UoC) i University of the Dutch Caribbean (UDC). Studaintenan tambe a kombersá i konta di nan eksperiensia na Minister pa ku e Programa Pre-Akadémiko i na mes momentu minister a hasi entrega simbóliko di un laptop na un studiante. Paso tur hòben ku partisipá na e programa aki ta haña un laptop.
