3 Aña di trabou di Glenbert Croes como Minister di Asuntonan Social y Labor

3 Aña di trabou di Glenbert Croes como Minister di Asuntonan Social y Labor

 

17 di november 2020 ta marca e di 3 aña desde inicio di gobernacion di Gabinete Evelyn Wever-Croes y alaves tambe di Minister Glenbert Croes cu e cartera di Ministerio di Asuntonan Social y Labor. Den cuadro di e vision unda e ser humano ta central, e maneho den e sector Social y Labor sigur ta un parti importante di gobierno. E mission mas importante di Gabinete Wever-Croes ta lanta tur mucha na Aruba cu siguridad, amor y cariño. E gobierno aki a demostra di duna e prioridad necesario na e tereno social. Specialmente considerando e retonan cu nos isla ta confrontando door di e crisis di Covid-19. 

 

Sector Social

 

E aspecto mas urgente desde e prome dia tabata e crisis social unda cu Minister Glenbert Croes su vision tabata pa un maneho integral cu tabata rekeri un coordinacion y cooperacion entre diferente departamento y instancia den e tereno social. Consequentemente, Minister Glenbert Croes a instala e fondo di Sociaal Crisis Plan (SCP) pa carga e coordinacion entre e instancianan mas vital contando cu profesionalnan trahando den e sector Social, Enseñansa, Husticia y Salud Publico. Ademas di e coordinacion y sinergia entre e instancianan tin mas di 30 proyecto financia door di e fondo di SCP cu ta fortifica e infrastructura di e tereno social cu enfoke ariba nos muchanan, hobennan, esnan cu limitacion fisico y famianan tocando temanan manera desaroyo personal, guia y sosten na famia, siguridad, bienestar, educacion, abuso en general, violencia domestico, pobresa, empleo y desempleo. Mester menciona cu SCP su ehecucion ta conta cu e apoyo tecnico y evaluacion di UNICEF na Hulanda. 

Apesar di e seriedad di e retonan, Sociaal Crisisplan sigur ta un logro importante cual tambe ta ser reconoci cu aprobacion den forma unanime di tur fraccion den Parlamento di Aruba pa e ultimo 3 añanan consecutivo. E desaroyo y progreso di cada proyecto di SCP ta wordo raporta pa kwartal den forma di raportahenan na instancianan oficial.

 

Minister Glenbert Croes ta considera Departamento di Asunto Social (DAS) un departamento vital pa ehecucion di su vision y maneho social. Ta trahando diligentemente riba automatisacion di Asistencia Social (bijstand), sosten pa abogado liber, guia y sosten di trahadonan social como tambe ofrece terapia psicologico na comunidad. DAS, DPL y DAO ta traha di cerca pa ofrece mamanan soltera un trayecto di desaroyo personal pa guia nan pa un trabou. 

Minister Croes ta traha estrechamente cu Bureau Sostenemi unda a oficialisa e instancia aki segun ley como e AMK (Advies en Meldpunt Kindermishandeling) na Aruba.  

E mandatario ta considera Formacion Social/SVT un heramienta hopi importante den duna nos hobennan un di dos oportunidad. Minister Glenbert Croes conhuntamente cu Marinierskazerne ta trahando riba e posibilidad pa por duna nos hobennan femenino tambe e oportunidad di por forma parti di Formacion Social/SVT.

 

Sector Laboral

 

Un parti esencial den maneho di Minister Glenbert Croes pa mehora e calidad di bida di nos hendenan y combati retonan manera desempleo ta atraves di un plan di accion den e sector laboral. Esaki ta un parti central di e vision y maneho di Minister Glenbert Croes unda durante e transcurso di e ultimo 3 añanan a logra aumenta e salario minimo na dos ocasion, esta na luna di mei 2019 unda a ahusta e salario minimo na Awg. 1.762,48 pa luna y na luna di januari 2020 unda cu e salario minimo a wordo ahusta na Awg. 1.815,35 pa luna. E dos aumentonan aki tabata importante pa mehora e poder di compra di nos trahadornan ricibiendo un salario minimo.

 

Minister Glenbert Croes a percura pa elimina e fenomeno di ontheffing como tambe introduci un maneho di admision laboral na Departamento di Progreso Laboral (DPL). Na Departamento di Labor y Investigacion (DAO) a implementa un plan nacional di accion pa yuda hobennan yega na un trabou. Minister Croes pa medio di DAO a percura pa haci un investigacion riba nos mercado laboral. Ademas, a institui un Comision Tripartidista Laboral entre Gobierno, Gremio Comercial y Gremio Sindical pa yega na siguridad, bienestar y progreso laboral pa tur nos trahadornan. Aruba pa medio di Minister di Asuntonan Social y Labor a participa na e congreso internacional di Organisacion Internacional di Labor (ILO). Segun meta di su maneho, Minister Croes a reactiva Fundacion C.A.S. como tambe a inicia e trayecto di reorganizacion di Dienst Huur- en Consumentenzaken cu e obhetivo principal pa duna proteccion na nos consumidornan.

 

Na comienso di 2020 nos pais a wordo confronta cu Covid-19. E crisis di Covid-19 cu a y ta afectando Aruba tambe tabata tin y tin ainda un efecto grandi den e sector laboral. Aki ta unda Gabinete Wever-Croes pa medio di Ministernan Glenbert Croes y Xiomara Maduro a introduci respectivamente FASE y Loonsubsidie pa tur trahador, dunador di trabou y ZZP’er cu a perde entrada pa via di e pandemia. Na luna di october ultimo a yuda un total di mas di 4 mil persona cu FASE, mas di 1500 dunador di trabou y mas di 20 mil persona cu loonsubsidie. Esaki ta demostra e compromiso cu Gabinete Wever-Croes tin pa e bienestar di su pais y su hendenan.

 

Minister Glenbert Croes ta hopi satisfecho cu e trabounan desplega y di tur e logronan durante e ultimo 3 añanan. Esaki ta danki na trabou valioso y esfuerzo di hopi persona cu ta contribui na e vision y maneho di Gabinete Wever-Croes y di Ministerio di Asuntonan Social y Labor. 

 

Aruba, 16 di November 2020.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: