Premier Evelyn Wever-Croes: Acuerdo di Landspakket a wordo manda pa Parlamento: ETAPA DI RECONSTRUCCION DI PAIS ARUBA A CUMINSA Aruba ta di nos tur y ta nos tur mester hiba nos pais padilanti

Premier Evelyn Wever-Croes:

 

Acuerdo di Landspakket a wordo manda pa Parlamento:

ETAPA DI RECONSTRUCCION DI PAIS ARUBA A CUMINSA

Aruba ta di nos tur y ta nos tur mester hiba nos pais padilanti

 

Prome Minister Evelyn Wever-Croes, pa medio di un carta dirigi na Presidente di Parlamento, Señor Ady Thijsen, a manda Parlamento e acuerdo di Landspakket cu a wordo firma diabierna 13 di november, 2020 cu Hulanda pa loke ta trata e sosten di likides pa e di tres tranche. 

 

Despues di lunanan intenso y no facil pa Gobierno di Aruba desde cu Covid a dal mundialmente, diabierna ultimo Gobierno di Aruba a firma acuerdo cu Hulanda. Cu esaki por bisa tambe cu Aruba a drenta un etapa caminda cu tin mas trankilidad riba e tema financiero y tambe un etapa caminda cu por cuminsa reconstrui Pais Aruba. Banda di esaki, Hulanda lo brinda Aruba sosten pa reactiva nos economia y mas seguridad na nos frontera. 

 

Siman pasa durante Rijksministerraad a bay di acuerdo cu e contenido di e propuesta di e entidad nobo Caribisch Orgaan voor Herstel en Ontwikkeling (COHO). Siguientemente; Aruba lo haya e 209 miyon florin e siman aki, un fiansa na 0 porciento di interes cu lo cuminsa paga bek na 2022. E tercer instalacion aki ta pa e periodo di 1di juli te cu 31 di december 2020.

 

E rijkswetten cu a wordo acorda esta: (1) supervision financiero/ Rijkswet Aruba Financieel Toezicht (RAFT) y (2) pa Caribisch Orgaan voor Herstel en Ontwikkeling (COHO), ta bay Raad van State y Raad van Advies (organonan consultativo) di Reino y di Aruba pa duna nan conseho riba e dos leynan aki. E consehonan aki ta bay pa Gobierno(nan) tene cuenta cu nan y despues pa e Parlamentonan. 

 

Cumplimento cu e condicionnan di e Rijkswet ta esencial pa ricibi proximo instalacionnan di sosten di likides financiero (liquiditeitssteun). Cu e acuerdo cu a yega na dje, Hulanda lo sigui extende e prestamo reparti den diferente quota te na 2025.

“Aruba awor ta cuminsa un etapa nobo, un etapa di reconstruccion di nos pais. Nos no mester tin miedo di e etapa aki. Nos a yega di enfrenta cosnan mucho mas pisa cu esaki, y nos a surpasa nan y hasta logra nos Status Aparte. 

Lamentablemente e mal maneho financiero di 2009-2017 a manca nos pais financieramente y Covid a bin pa caba di destrui’e prome cu nos por a caba di reconstrui’e. Esaki ta e realidad cu nos mester biba cu n’e. Pero awor ta cuminsa un etapa nobo. Ami ta cla pa e etapa aki. Ban uni y para fuerte poniendo Aruba prome. Aruba ta di nos tur y ta nos tur mester hiba nos pais padilanti”, Porme Minister Evelyn Wever-Croes a enfatisa.

 

Den tur transparencia, e acuerdo aki por wordo haya online pa prensa y pueblo di Aruba: https://issuu.com/gabinetewevercroesaruba