Minister Jesus-Leito ta risibí e rapòrt ‘Curacao Climate Change Policy Assessment’

 

Minister Jesus-Leito ta risibí e rapòrt ‘Curacao Climate Change Policy Assessment’

 

Willemstad – Dia 17 di novèmber 2020, Sr. Albert Martis, den su kalidat komo Representante permanente di ‘World Meteorological Organization’ (WMO), a hasi entrega di e ‘Curaçao Climate Change Policy Assessment’ na Minister Zita Jesus-Leito. Manera ta konosí ta un tópiko masha aktual mundialmente. Algun konsekuensia di kambio di klima ta oumento di frekuensia di wer ekstremo ku por kousa mas morto i paralisá ekonomianan. 

 

Den e kuadro aki, na 2015 paisnan miembro di Nashonnan Uni a firma e asina yama ‘Akuerdo di Paris’ pa konkretamente bini ku plannan pa mitigá riesgo di e impakto di kambio di klima. Na Kòrsou, Servisio Meteorológiko, komo esun responsabel pa duna Minister di Tráfiko, Transporte i Planifikashon Urbano, puntonan di atenshon riba maneho relashoná ku kambio di klima, a hasi un estudio di e estado aktual di Kòrsou riba e tereno aki. Na 2019, Minister Jesus-Leito a hasi apertura ofisial na e Seminario di Kambio di Klima. 

 

For di e estudio por a konkluí ku:

  • diferente aktor tin e nesesidat pa risibí mas informashon tokante e impaktonan di kambio di klima, 
  • tin nesesidat di kapasidat institushonal pa por yega na un maneho integral di kambio di klima pa Kòrsou, 
  • tin falta di fondonan na nivel nashonal pa por atendé debidamente ku kambio di klima. 

 

Tambe a presentá diferente rekomendashon, manera entre otro traha un guia ku ta enserá un plan stratégiko i un plan di implementashon pa por yega na un maneho integral di kambio di klima pa Kòrsou. Di e forma aki, Kòrsou lo ta mihó prepará pa por atendé ku kambio di klima den futuro. 

 

E programa di UNESCO a finansiá e proyekto aki, i a traha huntu ku ekspertonan di Ministerio di Salubridat Medio Ambiente i Naturalesa (GMN), Ministerio di Enseñansa, Siensia Kultura i Deporte (OWCS), Ministerio di Desaroyo Ekonómiko (MEO), i Ministerio di Tráfiko, Transporte i Planifikashon Urbano (VVRP). 

 

Minister Jesus-Leito ta sumamente kontentu ku e estudio aki i lo traha pa e maneho integral bira un realidat. Minister Jesus-Leito lo presentá esaki na Konseho di Minister pa aprobashon i ehekushon. Próksimamente ta bai duna informashon na diferente aktornan den nos komunidat.

This site uses Akismet to reduce spam. Learn how your comment data is processed.

error: Content is protected !!
%d bloggers like this: