Kondishon di pago personalisá ta pèrmití pero na interes di stabilidat finansiero; Moratorio genériko no ta rekomendabel mas
Kondishon di pago personalisá ta pèrmití
pero na interes di stabilidat finansiero;
Moratorio genériko no ta rekomendabel mas
Willemstad/Philipsburg – Pa redusí e impakto finansiero direkto di e krísis di coronavirus riba empresa
i konsumidó individual, na mart di e aña akí, Centrale Bank van Curaçao en Sint Maarten (CBCS) a
duna pèrmit pa e bankonan komersial ofresé nan klientenan moratorio di pago pa un periodo di tres
pa seis luna. Esei a nifiká ku e bankonan por a duna nan klientenan dispensashon di pago di tantu
kapital komo interes riba nan fiansa durante un periodo determiná, sin ku esei afektá posishon
finansiero di e banko en kuestion. Ademas, a permití e bankonan oumentá temporalmente e montante
máksimo ku por fia un persona na proporshon di su entrada (e debt-service ratio).
Sin embargo, e konseshon akí na e klientenan ta presentá sierto riesgo pa e bankonan komersial mes,
pa nan posishon finansiero den futuro i, komo tal, pa stabilidat finansiero. Pa e motibu akí, CBCS no
ta permití mas pa e bankonan sigui otorgá moratorio na un manera genériko, sin ku esei afektá e
provishonnan ku e banko en kuestion mester tin. No opstante, e bankonan por sigui evaluá, pa kada
kaso individual i konforme e reglanan di maneho vigente, kon nan por sostené nan klientenan ku ta
enfrentando difikultat finansiero, sin ku nesesariamente esei mester afektá e provishonnan ku e banko
en kuestion mester tin.
Ademas, CBCS a determiná ku no ta permití mas pa e bankonan komersial duna krédito ku ta surpasá
e debt-service ratio total di 37 porshento. Di e manera akí, CBCS ke prevení dunamentu di krédito
eksesivo na konsumidó i garantisá ku dunamentu di krédito na Kòrsou i Sint Maarten ta tuma lugá na
un manera prudente.
Willemstad, 18 di novèmber 2020
CENTRALE BANK VAN CURAÇAO EN SINT MAARTEN