Trabounan di mantenshon na brùg Juliana pa un montante di 7 mion florin

 

 

Willemstad, 15 di november 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di VVRP, señora Zita Jesus-Leito.

 

Danki pa e koperashon.

 

Atentamente,

 

Gilmar Pisas

Parlamentario pa

frakshon di MFK

 

Minister di VVRP

Señora Zita Jesus-Leito
PRESENTE

Kòrsou, 15 di novèmber 2020

Tópiko: Trabounan di mantenshon na brùg Juliana pa un montante di 7 mion florin 

 

Minister Jesus-Leito,

 

Ku asombro Movementu Futuro Kòrsou a tuma nota di anunsio di parti di Minister Jesus-Leito relashoná ku trabounan di mantenshon/fèrf ku ta bai kuminsá na Brùg Juliana (Brùg nobo). E asombro no ta pa e trabounan ku ta bai kuminsá, pero mas bien pa e no ponementu di prioridat na loke ku berdaderamente ta nesesidat di e pueblo.

 

Un mal kontentu grandi ta biba bou di gran mayoria di outomobilista di Kòrsou pa e kantidat di burakunan ku tin den nos kareteranan, burakunan grandi ku ta kibra tur kos bou di outo di siudadanonan. Pero Minister ta skohe pa kuminsá ku su proyekto pa fèrf i mantenshon di brùg ku ta kosta 7 mion florin. Hustamente den tempu ku pais ta luchando pa sobrebibí un Pandemia ku a kousa hopi daño na nos ekonomia i tambe falta di sèn ku gobiernu ta eksperensia.

 

Banda di esaki, pueblo riba retnan sosial ta kuestioná e “gunning” ku a bai pa un kompania ku Minister tin un relashon familiar ku e direktor. E impreshon di pueblo ta ku Minister Jesus-Leito a kuminsá kore kampaña elektoral pa elekshon di mart 2021 i kier tira santu den wowo di pueblo ku proyektonan ku direpente e Minister ta anunsiando.

 

Hasiendo uso di artíkulo 96 di Reglamentu di Órden, suskrito komo lider di frakshon di MFK kier hasi Minister Jesus-Leito e siguiente preguntanan;

 

1. Minister por informá Parlamento di Kòrsou na plaka chikí kon e proseso di destaho públiko a kana?

 

1. Ki dia i na kua aña a habri e destaho públiko aki i ki dia e ofertanan drenta i kuantu kompania a inskribí?

 

1. Kua tabata e montante ku e kompanianan aki a ofresé pa hasi e trabou aki na brug?

 

1. Kiko eksaktamente e proyekto di mantenshon i o fèrfmentu di Brùg aki ta enserá?

 

1. Kuantu tempu e trabounan aki ta dura?

 

1. Konforme e plan, kuantu di e 7 mion aki ta pa e parti di mantenshon di Brùg i kuantu plaka ta bai e trabounan di fèrfmentu?

 

1. Minister por manda pa Parlamento un rapòrt unda por mira ku mantenshon i fèrfmentu di e brùg na e momentu aki ta un prioridat i ku mester ehekutá e proyekto aki awor ku Kòrsou ta pasando den asina tantu malestar finansiero i ekonómiko?

 

1. Tin hopi karetera aki na Kòrsou ku ta super mal estado, dikon Minister no a hasi uzo di e 7 mion florin aki pa drecha e kareteranan ku ta den mal estado?

 

Sperando di por haña un kontesta den e tempu ku nos Reglamentu di Orden ta preskribí, nos ta keda

 

Atentamente

 

Gilmar Pisas

Parlamentario pa 

frakshon di MFK