Parlamentario El Ayoubi ta atvertí: “Si basilá ku bo komportashon den Covid-19, e ta bai kosta bo! ”
Curaçao, 19 di òktober 2020
Parlamentario El Ayoubi ta atvertí:
“Si basilá ku bo komportashon den Covid-19, e ta bai kosta bo! ”
Willemstad- Covid-19 a trese un desbalanse total den nos sosiedat influensiando gran parti di kontinuashon di nos desaroyo. Pa mas ku 7 luna kaba, nos sosiedat ta keda konfrontá ku tur e medidanan di prekoushon i protekshon pa kada unu di nos kumpli kuné.
Segun sr. El Ayoubi un di e problemanan di mas grandi di e malesa mundial aki ta ku e no tin un tempu definí pa terminá. Ku otro palabra Covid-19 lo keda forma parti di nos bida diario sea nos ke òf no, sea nos gusta òf no gusta. No ta keda nos nada mas pa rekonosé, aseptá i adaptá nos bida i kustumbernan rondó di Covid-19 sigur ora ta trata di seguridat, prekoushon, higiene, limpiesa i orden.
Komportashon responsabel di kada unu di nos ta e aspekto di mas grandi i importante pa seguridat i trankilidat den nos sosiedat kaminda ku esaki ta den nos mes man sigur durante un krísis di pandemia mundial. Lamentablemente sr. El Ayoubi a bin ta tuma nota di e oumento konstante i peligroso di e kasonan aktivo ku ta keda registrá i presentá na nos sosiedat diariamente pasobra un grupo “adulto” den nos sosiedat ta keda aktua di un manera hopi iresponsabel i infantil poniendo nan mes i demas siudadano den peliger ku por terminá den morto di un òf mas persona. Ta un falta flagrante di komprenshon i empatia pa e próhimo. Nos situashon riba e areanan emoshonal, sosial, ekonómiko, di enseñansa i salubridat tambe ta keda mas afektá si kada bes nos mes sigui okashoná oumento di kasonan aktivo!
Echo ta ku mester por frena e aktitut i komportashon iresponsabel aki, kaminda ku gobièrnu ta hañ’e obligá pa insentivá i òf adaptá e maneho pa ku Covid-19. Un di e medidanan ta ku gobièrnu lo bai atendé severamente ku e personanan ku hasi nan mes kulpabel i responsabel ora falta ku e reglanan imponé pa ku COVID-19.
Netamente den e kuadro aki Parlamentario El Ayoubi ku satisfakshon a tuma nota ku gobièrnu a manda e ordenansa di lei pa ku situashonnan eksepshonal, e asina yama ‘Landsverordening uitzonderingstoestand’ pa Parlamento i lo keda trata dia 23 di novèmber próksimo den un reunion públiko. E ordenansa aki ta trata formalisashon di un maneho spesial ora ku sirkunstansianan ekstraordinario, manera e pandemia di Covid-19 aki, presentá den pais.
E ordenansa aki ta duna outoridatnan kompetente e posibilidat i kuadro hurídiko i hudisial pa apliká un òf mas sanshon finansiero den forma di un of mas but. Esakinan por varia di 500 te ku 1 mion florin.
Ademas e ordenansa aki ta krea e posibilidat ku e persona ku faya i kibra ku e maneho di prekoushon stipulá pa gobièrnu pa ku Covid-19 por risibí un kastigu di prizòn te ku 4 aña.
Parlamentario El Ayoubi ta konvensí ku e ordenansa aki lo yuda gobièrnu tuma e medidanan nesesario i den e proporshonnan rekerí pa asina salbaguardiá i garantisá e siguridat nesesario den nos sosiedat kaminda salú di nos tur ta na promé lugá. Alabes e ordenansa di lei aki lo kontribuí pa asistí den e proseso pa sigui konsientisá e siudadano riba su responsabilidat propio pa asina kada unu di nos respetá i komportá den e krísis mundial aki.
Un pais ordená ta bon i safe pa nos tur!