Huntu nos lo kombatí Covid-19

Huntu nos lo kombatí Covid-19

Durante e reunion Ministerial di Salubridat, e asina yama “vierlandenoverleg”, di 8 di desèmber 2020, a deliberá tokante kon e paisnan di Reino Hulandes, huntu lo kombatí  e vírus di Covid-19. Den esaki Hulanda lo tin e ròl di proveé e islanan di vakuna, material i tambe ekspertisio. E strategia ta pa evitá ku e  vírus aki ta sigui plama den nos komunidatnan.

E reunion tabata dirigí riba e forma kon pa distribuí e vakuna, na momentu ku esaki yega na e diferente islanan. Pa esaki a lanta gruponan di trabou riba kada un di e islanan di Reino, ku ta traha riba puntonan spesífiko kual ta, investigá i bini ku proposishonnan pa loke ta trata almasenahe di e vakuna, e parti logístiko rondó di esaki i tambe kua ta e gruponan ku lo tin prioridat pa risibí e vakuna.  Ta trata prinsipalmente di e gruponan di riesgo. Esaki lo ta un desishon di kada isla separá, a base di e situashon lokal. E ekspektativa ta ku den promé kuartal di 2021 e vakuna lo yega e diferente islanan di Reino.