Minister Xiomara Maduro ta informa: Den december 1483 compania a haya sosten financiero den forma di Subisidio di Salario  Den aña 2020 a brinda 271.7 miyon na yudansa

 

Minister Xiomara Maduro ta informa:

Den december 1483 compania a haya sosten financiero den forma di Subisidio di Salario 

Den aña 2020 a brinda 271.7 miyon na yudansa

 

ORANESTAD – Pa comercio y trahadornan por surpasa e crisis economico cu COVID19 ta trece cune, Gobierno di Aruba a bin ta ofrece yudansa den forma di Subsidio di Salario. Desde mei companianan cu ta bin na remarca pa e yudansa aki ta wordo notifica door di SVB y ta haya un plazo di tempo den cual mester aplica pa e yudansa aki pa asina por cubri un maximo di 60% di e salario di trahador. E meta di e yudansa financiero aki ta pa durante e crisis di COVID19 por conserva cupo di trabou na beneficio di Aruba su economia. Den luna di december 2020, un total di 1483 compania a haya Subsidio di Salario pa por cumpli cu e salario di 19915 trahador. E suma concerni ta 26.4 miyon florin.

 

Den aña 2020 a brinda 271.7 miyon na yudansa den forma di Subsidio di Salario

Na mei tabata e promer biaha cu Gobierno a brinda yudansa den forma di Subsidio di Salario. Na e momento ey 1661 compania a haya yudansa pa paga salario di 25714 trahador pa e suma di 44.4 miyon. Na juni a yuda 1634 compania y 22387 trahador pa e suma di 40.1 miyon. Na juli ta 1470 compania cu 21335 trahador pa e suma di 35 miyon. Na augustus un total di 1583 compania a wordo yuda cu pago pa 20912 trahador pa e suma di 32.7 miyon. Den september 1573 compania y 20865 trahador a wordo yuda cu 32.2 miyon florin. Na oktober a yuda 1590 compania y 20877 trahador cu 30.9 miyon florin. Na november a yuda 1610 compania y 20774 trahador cu 29.5 miyon florin. Awor na december a yuda 1483 compania y 19915 trahador cu 26.4 miyon florin. Pues te cu awor Gobierno a brinda 271.7 miyon florin na yudansa financiero pa comercio den forma di Subsidio di Salario. Ta bon pa menciona cu Gobierno a paga Subsidio di Salario di lunanan di mei, juni y november y awor esun di december for di e fiansa cu ta haya di Hulanda. E otro lunanan e Subsidio di Salario a wordo cubri pa Presupuesto 2020 di Pais Aruba.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: