INTERUPSHON TEMPORAL DEN SUMINISTRO DI KORIENTE

 

INTERUPSHON TEMPORAL DEN SUMINISTRO DI KORIENTE

 

Willemstad, 9 di yanüari 2021 – Djadumingu 10 di yanüari 2020, di 7’or pa mas tardá 9’or di mainta, Aqualectra ta tuma akshonnan nesesario den operashon di e ret di koriente pa garantisá suministro di energia. E akshon aki ta basá riba rekomendashonnan di e análisis hasí relashoná ku e seri di ‘black out’ ku a tuma lugá resientemente. Den kuadro di esaki un área grandi di suministro lo keda sin koriente pa dos ora máksimo. 

 

Despues di e último interupshon ku a tuma lugá djaluna 4 di yanüari, e tim di téknikonan di Aqualectra a bin ta traha inkansabelmente pa yega na un solushon. E análisis hasí ta yudando Aqualectra yega hopi mas serka di e kousa raís ku ta okashonando instabilidat den nos ret. E rekomendashonnan di e análisis ta hiba Aqualectra na tuma algun paso nesesario pa atendé ku operashon den nos ret ku lo garantisá suministro di koriente na komunidat. 

 

Den kuadro di e akshonnan menshoná djadumingu awor, 10 di yanüari 2021, un area grandi di suministro lo keda sin koriente. Lo kita koriente di un forma kontrolá for di e áreanan aki pa hasi e adaptashon nesesario den nos ret. E barionan ku lo pèrdè koriente den e orario di 7’or pa mas tardá 9’or di mainta ta: Bottelier (algun parti), Containerhaven, Dominguito, Jantiel te ku besindario di Kleine Wereld, Janwe i besindario, Jupiterstraat, Kintjan, Koraalspecht, Korporaalweg i besindario, Kustbatterij, Oude, Caracasbaaiweg, Pallastraat, Parera, Punda (algun parti), Salinja, Scharloo (algun parti), Steenrijk, Strada, Tinweg, Vista Royal, Vredenberg i Zeelandia (algun parti).

 

Aqualectra no ta spar ningun esfuerso pa garantisá suministro di energia na nos komunidat. Aqualectra ta pidi diskulpa pa e inkumbinensia kousá i alabes ta yama komunidat danki p’e komprenshon i indulgensia.