Minister Croes a topa ku músiko Norman Moron

Minister Croes a topa ku músiko Norman Moron

 

Willemstad 22 yanüari 2021- Minister di Enseñansa Siensia Kultura i Deporte (ESKD) Minister Steven Croes a topa ku e músiko Norman Moron. Norman ta internashonalmente hopi konosí i ta un di e gran baluartenan di Kòrsou.

 

Djadumingu 17 di yanüari último den un ambiente ameno Minister di Enseñansa Siensia Kultura i Deporte (ESKD) Steven Croes a kombersá ku Norman Moron tokante su karera komo músiko. Sr. Norman Moron a splika ku for di chikitu e tabata gusta músika. Ku su 12 aña el a kuminsá kompaña artistanan for di entre otro Aruba, Merka, Venezuela, Cuba. 

Norman tabatin e ambishon pa bai studia músika na Hulanda pero pa falta di fondo e tempu ei, e no a logra realisá su soño. Pero Norman no a para ketu. El a sigui desaroyá su talento i a kompaña varios artista lokal i internashonal manera Rudy Plaate, Padu del Caribe, Edgar Palm i Julio Iglesias. Norman ta orguyoso ku ela toka ku Metropool Orkest di Hulanda. Tambe el a komponé un Wals pa Reina Maxima titulá “Prinsesa Maxima”. 

Banda ku e tabata toka tur anochi den hotel pa kompañá artistan di Kòrsou i otro país, pa 40 aña, e tabata lanta mainta bai traha na Fatum, ku a rekonosé Norman komo un tremendo trahadó. 

Na 2019 Gobièrnu di Kòrsou a otorgá e Premio Willem C.J. (Boeli) van Leeuwen na sr. Norman Moron pa su prestashon meritorio den e ramo di músika. E premio Boeli van Leeuwen ku ta keda otorgá kada dos aña na un òf mas persona òf organisashon ku a alkansá prestashon intelektual ekselente riba tereno kultural, hurídiko, gubernamental, sosial òf periodístiko.

Awendia aparte di toka pa eventonan, Norman Moron ta duna lès di músika na mas òf ménos 85 hòben. Norman a skibi tambe un buki titulá “Legendary Notes” ku ta un kompilashon historial di su komposishonnan i tambe di un otro músiko renombrá Sr. Rudy Plaate. Pronto e lo presentá e buki aki.

 

Minister Croes a keda impreshoná ku e historia di Norman Moron su bida. Norman a promové músika di nos isla di un forma inigualabel ku energia positivo i ku hopi amor den su grabashonnan, durante su aktuashonnan lokal i internashonal. No solamente komo kompositor, pianista i artista, pero tambe komo dosente di piano, Norman Moron a sa di eduká sentenáres di nos hóbennan riba tereno musikal. Semper Norman a mantené kalidat artístiko di Kòrsou na un nivel altu. Su partisipashon den farándula lokal i su sosten na nos artistanan lokal ta hasi di Norman Moron un di e personahenan mas importante riba tereno músikal na Kòrsou. Un baluarte ku nos ta orguyoso di dje. Pesei mester siña nos muchanan fo’i chikí tokante e gran músiko aki i mustra nan riba e importansia pa nan desaroyá nan propio talento.