Prome Minister Evelyn Wever-Croes Relato Anual 2020 di Ministerio di Asunto General: DURANTE 2020 HOPI ATENCION A BAY NA COMUNICACION ENTRE GOBIERNO Y PUEBLO Y MANEHO DI CRISIS

 

Prome Minister Evelyn Wever-Croes

 

Relato Anual 2020 di Ministerio di Asunto General:

DURANTE 2020 HOPI ATENCION A BAY NA COMUNICACION ENTRE GOBIERNO Y PUEBLO Y MANEHO DI CRISIS

 

Desde inicio di Gobernacion, Gabinete Wever – Croes a stipula cu lo hiba un maneho caminda cu ta pone e ser humano como punto central di desaroyo. A compromete cu lo haci esaki aplicando e metanan di “Sustainable Developement Goals (SDG)” cual ta un lista di 17 meta defini entre paisnan globalmente (Nacionnan Uni) pa por logra un bida sostenibel pa un y tur. Den e acuerdo di Gobernacion Hunto pa Aruba, miembronan di coalicion a haci palabracion riba e implementacion di diferente maneho cu ta contribui na e metanan aki. 

 

Metanan di Ministerio di Asuntonan General

Minister encarga cu asuntonan general ta encarga pa cumpli cu 12 meta, for di cual 11 di e metanan sea a wordo realisa caba of ta den diferente fase di implementacion. 

Manera entre otro: 

• Introduccion di un “Ley di financiamento di Partidonan Politico”, cual a keda aproba pa Parlamento. 
• Introduccion di “Begrotingskamer” pa garantisa transparencia y efectividad di e procesonan financiero di gobernacion y un “Integriteitskamer” pa vigila y garantisa e integridad di gobernantenan y funcionarionan publico, pa cual Bureau Integriteit a wordo instala. 
• Traha riba un ley nobo encuanto “Screening di Ministernan”, esaki ta den su ultimo fase di tratamento na Parlamento. 
• A inicia cu introduccion di un Codigo di Conducta pa Ministernan y Parlamentarionan. 
• Tambe a inicia cu introduccion di legislacion of reglamentacion adicional pa elimina/limita corupcion den gobernacion. 
• E institucion di un comision di experto pa evalua e miho forma pa depolitisa maneho di personal pa evita mal uzo pa metanan politico tambe ya ta den proceso. 
• Y e ley di Ombudsman ya a wordo aproba pa Parlamento, awor solamente falta e cambio di ‘staatsregeling’

 

Di e forma aki tin un bista riba algun di e metanan cu a/traha riba dje. Tin varios otro meta introduci, cu lamentablemente no por a cumpli cu tur ainda debi na e enfasis cu Gobierno mester a pone riba e pandemia di COVID-19.

 

Comunicacion

Banda di esaki, Gabinete Wever – Croes ta keda pone enfasis riba e aspecto di comunicacion. Principalmente pa informacion corecto ta accesibel na tur ciudadano. Esaki sigur a hunga un rol sumamente importante durante 2020 teniendo na cuenta tur e cambionan cu COVID-19 a trece cu ne. Na 2019 a traha riba fortificacion y sostenibilidad di e departamento Bureau Voorlichting (BUVO). BUVO ta maneha e presupuesto di media y ta encarga cu e publicacion di informacion den medionan di comunicacion. Aña 2020 tabata un aña cu a mustra con importante e pagina di Facebook di Gabinete Wever – Croes tabata pa percura pa facilita e proceso di comunicacion di informacion tocante entre otro Covid den forma mas directo cu usuarionan di e plataforma. Un otro forma cu Gabinete Wever – Croes a percura pa keda mantene pueblo informa ta a traves di e corant digital “IslaOnline” cu ta publica di dialuna pa diabiera y ta contene informacion di trabounan di cada Ministerio. 

 

Masterplan Reposition Our Sails 

Aña 2020, Aruba a haya su mes confronta cu un situacion social economico di urgencia a consecuencia di e Coronavirus. P’esey, Prome Minister a bin cu e iniciativa pa desaroya un plan di implementacion cu lo percura pa recuperacion economico. E Masterplan “Repositiong our Sails” ta enfoca riba crecemento economico sostenibel y ta conta cu participacion di profesionalnan di sector publico y priva. E masterplan aki lo sirbi como guia pa Aruba por para bek riba su pia. Imporante pa agrega ta, cu e masterplan tin mesun meta y prioridad cu e medidanan/condicionnan den e landspakket cual ta e pakete di condicionnan stipula pa Hulanda pa Aruba por bin na remarca pa financiamento. 

 

Maneho di crisis

Pa conclui, por mira un aña 2020 caminda cu hopi enfasis a bay riba comunicacion, maneho di crisis y mitiga calamidad. Gabinete Wever – Croes y diferente departamento y profesionalnan a traha duro pa atende cu crisis relaciona cu Covid, maneho di capacidad di cuido, crisis social, y crisis di migrantenan di Venezuela cu tambe a bin cu diferente consecuencia. 

 

Comunicacion ta e clave pa un poblacion bon informa, y na 2021 Gabinete – Wever Croes lo sigui enfoca riba comunicacion structural entre Gobierno di Aruba y pueblo.