Enseñansa spesial riba kaminda pa un transishon positivo ku atenshon di Minister Croes, Minister di Enseñansa Siensia Kultura i Deporte (ESKD) Steven Croes den kuadro di Dia di San Valentino a bishitá nos muchanan na Soeur Hedwig school.  

Enseñansa spesial riba kaminda pa un transishon positivo ku atenshon di Minister Croes 

 

Willemstad 16 febrüari 2021- Minister di Enseñansa Siensia Kultura i Deporte (ESKD) Steven Croes den kuadro di Dia di San Valentino a bishitá nos muchanan na Soeur Hedwig school. 

 

Djabierne 12 di febrüari último Minister Croes a hasi un bishita na Soeur Hedwig school. Un skol masha bunita mes, moderno i kolorido, kaminda maestronan ku hopi amor ta duna lès na mas òf ménos 60 mucha ku un desabilidat físiko i/òf mental. Minister Croes por a eksperensiá ku kuantu dedikashon i amor maestronan ta saka lo máksimo for di e muchanan. Ku hopi amor e muchanan a risibí e minister i kada klas a traha nan propio regalitu pa nan duna minister. Soeur Hedwig school ta kai bou di enseñansa spesial di fundeshi. Aña pasa Ministerio di ESKD a laga hasi un investigashon pa haña un bista total di e populashon den skolnan pa enseñansa spesial. Tambe a traha un repartishon nobo den diferente cluster. Bandi di esakinan a traha un modelo di transishon ku mester halsa e kalidat di enseñansa spesial pa asina kada alumno por desaroyá optimalmente. 

E repartishon den diferente cluster i e modelo di transishon a keda desaroyá den estrecho koperashon ku tur skol pa enseñansa spesial i diferente eskpèrto. Tambe a traha un konsepto di lei pa enseñansa spesial ku ya ta na e departamentu hurídiko di gobièrnu pa e konsehonan nesesario. Riba petishon di Minister Croes den simannan binidero Ministerio di ESKD ta bai kuminsá duna mas informashon riba e lei i e kambionan ku a keda proponé. Minister Croes ta sumamente kontento ku e trabou hasí te aworaki pa asina pronto por kuminsá ehekutá e transishon pa asina halsa e kalidat di e tipo di enseñansa aki tambe. Prinsipalmente nos muchanan ku mester di un atenshon èkstra pa nan por desaroyá nan talento i partisipá den nos komunidat, tin tur atenshon di e mandatario. Soeur Hedwig school sigur por konta ku Minister Croes ta hasi su máksimo esfuerso pa yuda solushoná e problemanan ku e skol ta konfrontando aktualmente.