Kòrsou ta kla pa bakuná
Kòrsou ta kla pa bakuná
Geplaatst op 18 February 2021 dor di Ministerio Asuntunan General i Promé Minister
WILLEMSTAD – Durante un Konferensha di Prensa djaweps, 18 di febrüari 2021, Gobièrnu a anunsiá ofisialmente ku entrante djárason dia 24 di febrüari próksimo, e promé siudadanonan di Kòrsou lo kuminsá risibí e bakuna kontra COVID-19.
Manera ya a anunsiá anteriormente, e promé gruponan ku ta bini na remarke pa risibí e bakuna, ta personanan 60+ i esnan ku ta laborá den e sektor di kuido i tin kontakto direktamente ku pashènt. Despues di e grupo akí, tur demas siudadano riba 18 aña tambe lo por registrá pa risibí e bakuna kontra COVID-19. E bakuna ta kompletamente grátis i kada persona por disidí pa su mes si akaso e ke tuma e bakuna akí. Mas ku klaro, nos tur ta deseá di poko poko drenta un etapa nobo kaminda nos por ta mas liber pa yega serka otro, mustra afekshon i kompartí momentunan balioso ku nos sernan kerí. Inisio di e trayekto di bakunashon akí na Kòrsou, ta nifiká pues tambe e oportunidat pa nos tur kontribuí pa reinventá nos bibá.
Durante e Konferensha di Prensa, dr. Iralice Jansen entre otro a duna informashon amplio tokante e proseso promé i durante yegada di e promé lote di bakuna na Kòrsou i kon nos ta ban kontinuá e proseso awor ku ofisialmente ta bai inisiá ku bakunashon kontra Covid-19 na Kòrsou.
Entrante djabièrnè 19 di febrüari, tur persona ku ta kai den e promé gruponan ku ta bini na remarke pa un bakuna, por kuminsá registrá pa un sita pa bakuná. Pa registrá, por yama Helpdesk 9345 grátis, di djaluna pa djasabra di 8’or di mainta pa 5’or di atardi. Registrashon di personanan ku ta traha den kuido, ta kana via di nan dunadó di trabou.
Riba mesun dia Gobièrnu di Kòrsou ta lansa e wèpsait www.bakuna.cw kaminda ta bai kompartí mas informashon tokante bakunashon na Kòrsou. Pronto lo por registrá pa un sita pa bakuná via di e wèpsait aki tambe.
Por último, Maharo Isenia, Direktor di Komunikashon di Gobièrnu di Kòrsou, a hasi tambe introdukshon di e bachi nobo den kua Gobièrnu ta bai kompartí tur informashon tokante COVID-19 i bakunashon na Kòrsou. “BIBANDO” ta un invitashon pa kada biaha di nobo nos sigui dal stap, bira unu ku e ritmo i kadans di bida i kana bai dilanti.
Klek riba e imagen pa e Presentashon di awe, djaweps 18 di febrüari 2021, durante e Konferensha di Prensa.
