Haitham Metry: Awendia arte ta mihó invershon pa futuro Partido Democraat ke akademia di arte komo dam pa warda awa

 

Haitham Metry: Awendia arte ta mihó invershon pa futuro

Partido Democraat ke akademia di arte komo dam pa warda awa

 

WILLEMSTAD – Ta imperativo pa introdusí un akademia di arte na Kòrsou, komo ku arte riba su mes ta un mihó fuente di invershon pa futuro, di akuerdo ku Haitham Metry number seis (6) riba lista di Partido Democraat (PD).

Ántes invershonistanan ta kumpra propiedat, manera un tereno i warda e balor subi pa por bende esaki ku ganashi, pero esei no ta rendabel mas, segun Metry a aklará su ponensia den un reakshon.

 

Awendia un piesa di arte ta e forma pa traha dam pa warda awa, dor di kumpra esaki i spera ku su balor ta subi pa rebendé, meskos ku tabata hasi ku tereno, loke konsekuentemente ta nifiká mas atenshon riba produkshon di arte.

“Partido Democraat ta boga pa un akademia di arte i tambe un seyo di rekonosimentu pa arte lokal di Kòrsou,” segun Metry a splika. Ántes tabatin un akademia na Kòrsou, pero esei a kaba na nada i mester rebib’é.

 

Si ántes e invershonista tabata kumpra propiedat i warda balor subi pa por rebendé ku ganashi, awor esei no ta rendabel mas debí na OZB (onroerendezaakbelasting). OZB ta e sumpiña den wowo di invershonistanan, pero tambe di un yu di tera ku a konstruí su kas tiki tiki ku yudansa di famia i amigunan. OZB ta hasi e invershon den tereno inatraktivo i praktikamente nihil.

Metry kende alabes ta hotelero, ta bisa ku awendia invershonistanan ta kumpra arte i warda esaki subi di balor, pa bendé usando teknologia moderno i entreg’é na kualke parti di mundu.

Aktualmente tin algun artista ta eksportá nan arte, pero esei no ta sufisiente i mester probechá dje último desaroyonan. “Arte ta subi mas lihé di balor ku un tereno,” segun Metry a enfatisá e prioridat di un akademia di arte.

 

Metry ta konvensí ku ta tempu pa Kòrsou tin su mes akademia di arte di un nivel haltu pa yuda e siudadano di Kòrsou desaroyá su talento i tambe pa atraé studiantenan di eksterior pa bin studia aki. “Un studiante strañero ta trese divisa den nos ekonomia aparte di krea mas kupo di trabou, tantu rondó dje akademia di arte mes, pero tambe sekundariamente den loke e studiante di afó ta gasta pa biba”.

 

Finalmente Metry a señalá ku mester separá arte for di suvenir i introdusí un seyo di rekonosimentu pa arte lokal riba un nivel internashonal.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: