Partido Democraat tabata di bishita serka gerensia di Curaçao Ports Authority (CPA)

Partido Democraat tabata di bishita serka gerensia di Curaçao Ports Authority (CPA)

 

“Partido Democraat ta boga pa krea un òf mas haf pa yatenan grandi i luhoso. Si nos merkadeá esaki bon, nos por atraé un otro tipo di turista aki na Kòrsou”.

 

Djaweps 18 di febrüari último, lider di Partido Democraat sra. Elsa Rozendal huntu ku un delegashon konsistí di kandidato #3 i #5 riba lista, sr. Tercy Ignatia i sr. Chehadi Eddine a hasi un bishita di kortesia serka e gerensia di CPA.

Meta di bishita tabata pa ámbos partido sera konosí ku otro i interkambiá riba diferente tema relashoná ku nos diferente hafnan, ekonomia i turismo. Direktor General di CPA sr. Humberto de Castro a duna un presentashon di CPA su tareanan i tambe e diferente proyektonan ku a wòrdu realisá den 2020 i lokual ta pendiente pa wòrdu ehekutá ainda.

Proyektonan manera “The Wharf” ku ta e apartamentunan luhoso riba Kleine Werf ku bista riba nos haf i tambe e Waaigat Marina Development pa boto i yatenan di rekreashon ta proyektonan ku na e momentunan aki ta den ehekushon.

Ta bon pa indiká ku vários di e proyektonan di CPA ku aktualmente ta pendiente pa wòrdu ehekutá, ta proyektonan ku tin deskribí den nos Agenda21. Partido Democraat ta boga pa krea un òf mas haf pa yatenan grandi i luhoso. Si nos merkadeá esaki bon, nos por atraé un otro tipo di turista aki na Kòrsou.

Un otro punto mas ta e plan gigantesko pa desaroyá Bullenbaai, Annabaai i tambe Caracasbaai. Un plan ku sigur lo trese desaroyo grandi i ku lo tin un “spin-off” den nos ekonomia.

Tabata interesante pa skucha kon Kòrsou a fungi komo un “standplaats” pa diferente barku krusero durante e periodo di Covid-19. Na un dado momentu nos por a mira mas ku 13 barku di turista di parker na e diferente wafnan ku Kòrsou konosé. Aparte ku e kompania di barku ta paga derecho portuario na CPA e ta algu positivo tambe pa e diferente kompanianan lokal ku ta duna servisio na e barkunan aki. E kompanianan aki a eksperensiá pèrdida finansiero pisá na momentu ku barkunan krusero a stòp di nabegá pa motibu di Covid-19.


Partido Democraat kier gradisí CPA pa duna nos e oportunidat pa interkambiá informashon balioso ku otro riba temanan di sumo importansha riba entre otro nos ekonomia.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: